Inflacioni në Shqipëri u ngadalësua në muajin shtator, duke zbritur në 2.9%, nga 3.2% që ishte një muaj më parë. Sipas të dhënave të INSTAT, çmimet e konsumit u rritën me 0.4% krahasuar me gushtin.
Niveli i inflacionit në shtator ishte 2.9%, kundrejt 2.4% që ishte në të njëjtin muaj të vitit të kaluar. Kjo shifër është tashmë pranë objektivit prej 3% të Bankës së Shqipërisë.
Pavarësisht ngadalësimit të përgjithshëm të inflacionit, ushqimet vijojnë të jenë ndër grupet që kanë dhënë ndikimin më të madh në rritjen e çmimeve. Grupi “Ushqime dhe pije joalkoolike” kontribuoi me 0.96 pikë përqindje në inflacionin vjetor, ndërsa çmimet e tij u rritën me 2.8% krahasuar me shtatorin e vitit të kaluar.
Pas ushqimeve, ndikimin më të madh e pati grupi “Transporti”, me 0.81 pikë përqindje. Çmimet në këtë grup u rritën me 12.4% në bazë vjetore.
Në rritjen e përgjithshme të çmimeve ndikuan gjithashtu grupet “Qira, ujë, energji elektrike, gaz dhe lëndë djegëse të tjera”, me 0.54 pikë përqindje, dhe “Mobilie, pajisje shtëpie dhe mirëmbajtje e shtëpisë”, me 0.16 pikë përqindje.
Ndërkohë, disa kategori shënuan ulje çmimesh. “Veshje dhe këpucë” ndikuan negativisht me 0.12 pikë përqindje, ndërsa “Informacioni dhe komunikimi” me 0.04 pikë përqindje.
Sipas të dhënave të INSTAT, në shtator rritjen më të madhe vjetore të çmimeve e regjistroi transporti me 12.4%, i ndjekur nga “Argëtim, sport dhe kulturë” me 5.9% dhe “Sigurime dhe shërbime financiare” me 4.5%.
Edhe pse inflacioni i përgjithshëm është ngadalësuar, të dhënat tregojnë se presioni mbi buxhetet familjare vijon të jetë i pranishëm, veçanërisht për shpenzimet ushqimore dhe të transportit.