“Vallja e Osman Takës” në Listën Kombëtare të Trashëgimisë, Rama: Simbol i identitetit çam, krenarisë dhe qëndresës!
Vallja e Osman Takës është përfshirë në Listën Kombëtare të Trashëgimisë Kulturore Jomateriale të Shqipërisë, duke u njohur si një prej vlerave të rëndësishme të traditës kulturore shqiptare.
Kryeministri Edi Rama ka ndarë lajmin përmes një postimi në rrjetet sociale, ku thekson se kjo valle, e lidhur me figurën legjendare të Osman Takës nga Konispoli, mbart historinë, krenarinë dhe qëndresën e një tradite të përcjellë ndër breza.
Sipas tij, vallja simbolizon trimërinë, sakrificën, solidaritetin dhe shpirtin e lirë.
“Vallja e Osman Takës përfshihet në Listën Kombëtare të Trashëgimisë Kulturore Jomateriale të Shqipërisë.
Simbol i identitetit çam, kjo valle mbart historinë, krenarinë dhe qëndresën e një tradite të përcjellë ndër breza. E lidhur me figurën legjendare të Osman Takës nga Konispoli, ajo ndërthur forcën dhe elegancën, duke shprehur trimërinë, sakrificën, solidaritetin dhe shpirtin e lirë”, shkruan Kryeministri Rama.
