Një 35-vjeçar shqiptar ka humbur jetën në një aksident të rëndë të ndodhur në pyjet e Rasorës, në zonën e Bolonjës, në Itali.
Viktima është identifikuar si Shkëlzen Pali, i cili prej disa vitesh jetonte dhe punonte në Itali.
Në momentin e ngjarjes, Pali ndodhej në pyll bashkë me një koleg, ndërsa të dy po merreshin me prerjen dhe transportimin e pemëve.
Për lëvizjen e trungjeve përdorej një teleferik i lëvizshëm. Sipas rindërtimit paraprak të aksidentit, incidenti ka ndodhur gjatë aktivizimit të mekanizmit të kabllos.
Dyshohet se kablloja ishte formuar në një pjesë si një lak mbi tokë dhe 35-vjeçari, pa e kuptuar rrezikun, kishte futur këmbët brenda saj. Në momentin që teleferiku u vu në funksion, kablloja është tërhequr dhe e ka goditur rëndë shqiptarin.
Pavarësisht ndërhyrjes, 35-vjeçari nuk ka mundur të mbijetojë.
Rrethanat e plota të aksidentit po hetohen nga autoritetet italiane, të cilat pritet të përcaktojnë edhe dinamikën e saktë të ngjarjes.
