Disa burra që ndihen të kërcënuar ose të intimiduara nga gratë e forta mund të përdorin fjalë dhe sjellje që synojnë t’ua ulin vetëbesimin dhe t’i bëjnë të ndihen më pak të sigurta në veten e tyre. Sipas artikullit, këto komente mund të duken si përpjekje për të fituar kontrollin e një situate, por në shumë raste mund të jenë mënyra për të fshehur pasigurinë e vetë personit.
Ja 10 shprehje që mund të përdoren në këto raste:
1. “Po e tepron.”
Kur një burrë i thotë një gruaje se “po e tepron”, ai mund të jetë duke zhvlerësuar emocionet e saj dhe duke e zhvendosur vëmendjen nga veprimi që shkaktoi reagimin e saj. Në vend që të diskutohet problemi, fokusi kalon te mënyra se si ajo reagoi. Kjo mund ta bëjë gruan të ndihet sikur emocionet e saj nuk janë të vlefshme ose sikur ajo është përgjegjëse për konfliktin.
2. “Qetësohu.”
T’i thuash dikujt “qetësohu” gjatë një diskutimi të tensionuar rrallëherë e zgjidh problemin. Përkundrazi, mund të shkaktojë edhe më shumë irritim. Në disa raste, kjo shprehje përdoret për ta paraqitur gruan si të paarsyeshme ose jashtë kontrollit emocional, ndërsa burri vendos veten në rolin e personit të qetë dhe racional.
3. “Je shumë ambicioze.”
T’i thuash një gruaje se është “shumë ambicioze” mund të duket si një vërejtje e pafajshme, por ndonjëherë mund të fshehë një pasiguri. Një burrë që ndihet i kërcënuar nga suksesi i partneres mund ta shohë ambicien e saj si konkurrencë, në vend që ta konsiderojë atë një cilësi pozitive. Në vend që të ndihet krenar për sukseset e saj, ai mund të përpiqet ta bindë se duhet të jetë më pak kërkuese, më pak e pavarur ose të ketë më pak synime.
4. “Thjesht ke pasur fat.”
Kur dikush ia atribuon suksesin një gruaje vetëm fatit, ai minimizon punën, talentin dhe përpjekjet që ajo ka bërë. Kjo mund të jetë një mënyrë për të mos pranuar se ajo e ka arritur suksesin me meritat e veta. Në vend që të motivohet nga arritjet e saj, një person i pasigurt mund të përpiqet t’ia zvogëlojë vlerën.
5. “Thjesht po tregohem i sinqertë.”
Kjo shprehje shpesh vjen pas një komenti të ashpër ose përçmues. “Sinqeriteti” mund të përdoret si justifikim për të thënë diçka lënduese. Por të jesh i sinqertë nuk do të thotë të jesh i pasjellshëm. Sinqeriteti i shëndetshëm kërkon edhe empati dhe respekt për personin tjetër.
6. “Je frikësuese.”
Në pamje të parë, kjo mund të tingëllojë edhe si kompliment. Por, sipas artikullit, ndonjëherë një burrë mund ta përdorë këtë shprehje për të treguar se ndihet i pasigurt përballë një gruaje të sigurt dhe të vendosur. Në vend që të përballet me pasiguritë e veta, ai mund ta paraqesë vetëbesimin e saj si një problem. Në të vërtetë, ajo mund të mos jetë “frikësuese”; ai thjesht mund të ndihet i intimiduar nga vetëbesimi i saj.
7. “Ti nuk je si gratë e tjera.”
Në varësi të kontekstit, kjo mund të duket si kompliment. Por jo gjithmonë është kështu. Kjo shprehje mund të përdoret për ta vendosur një grua në konkurrencë me gratë e tjera dhe për t’i krijuar idenë se ekziston një mënyrë “e duhur” për të qenë grua. Në disa raste, një burrë mund ta përdorë këtë teknikë për ta bërë partneren të përpiqet më shumë për miratimin e tij.
8. “Më lër të ta shpjegoj.”
Kjo shprehje lidhet shpesh me atë që njihet si “mansplaining” kur një burrë i shpjegon një gruaje diçka që ajo tashmë e kupton, shpesh në një mënyrë tepër patronizuese. Problemi nuk është shpjegimi në vetvete, por mënyra se si përdoret ai për të krijuar përshtypjen se burri ka më shumë njohuri apo autoritet. Kur një grua e kupton qartë një çështje, por partneri këmbëngul ta trajtojë sikur ajo nuk di asgjë, kjo mund të jetë përçmuese dhe mungesë respekti.
9. “Nëse vazhdon të sillesh kështu, asnjë burrë nuk do të të dojë.”
Kjo është një nga shprehjet më manipuluese në një debat. Qëllimi mund të jetë ta bëjë gruan të dyshojë te vetja dhe të besojë se sjellja e saj do ta lërë vetëm. Në këtë mënyrë, burri përpiqet të krijojë idenë se ajo duhet të ndryshojë mënyrën se si sillet për të fituar miratimin e tij. Por fakti që një grua shpreh mendimin e saj, vendos kufij ose nuk pajtohet me partnerin nuk do të thotë se ajo është “e padëshirueshme”.
10. “Duhet të buzëqeshësh më shumë.”
T’i thuash vazhdimisht një gruaje se duhet të buzëqeshë mund të duket si një koment i parëndësishëm, por ai mund të fshehë një pritshmëri që ajo të jetë gjithmonë e këndshme dhe e bindur. Një grua nuk ka detyrimin të duket e lumtur vetëm për t’i bërë të tjerët të ndihen rehat. Nëse një burrë ndihet i parehatshëm vetëm sepse një grua është serioze, e vendosur apo nuk buzëqesh kur ai dëshiron, problemi nuk është domosdoshmërisht te ajo.
