Dy shtetas letonezë janë arrestuar në Britaninë e Madhe, pasi dyshohet se kanë kapërcyer gardhin rrethues dhe janë futur pa autorizim në bazën e Forcave Ajrore Mbretërore (RAF) në Molesworth, Cambridgeshire, e cila përdoret nga inteligjenca ushtarake amerikane.
Bëhet fjalë për dy burra, 36 dhe 32 vjeç, të cilët u gjetën brenda bazës dhe u arrestuan nga autoritetet britanike.
Sipas autoriteteve, ata dyshohen për hyrje në një zonë të ndaluar me një qëllim që mund të dëmtojë interesat e Mbretërisë së Bashkuar. Ngjarja u zbulua pasi patrullat e sigurisë së Ministrisë britanike të Mbrojtjes vunë re një automjet të braktisur pranë perimetrit të bazës.
Gjatë kontrolleve të mëtejshme, autoritetet konstatuan një dëmtim të vogël në gardhin rrethues. Pas kërkimeve, dy shtetasit letonezë, të cilët jetojnë në Britaninë e Madhe, u lokalizuan dhe u vunë në pranga.
Fillimisht, ata u ndaluan nën dyshimin për hyrje të paautorizuar në një objekt të mbrojtur dhe për dëmtim kriminal. Më pas, ndaj tyre u shtua edhe dyshimi në bazë të nenit 4 të Ligjit për Sigurinë Kombëtare të vitit 2023.
Baza “RAF Molesworth” konsiderohet një objekt me rëndësi strategjike. Sipas të dhënave të publikuara nga CIA, aty ndodhen qendra të operacioneve të zbulimit amerikan për Evropën dhe Afrikën, si dhe një qendër e zbulimit të NATO-s.
Dy të arrestuarit ndodhen ende në paraburgim, ndërsa autoritetet britanike vijojnë hetimet për të përcaktuar rrethanat dhe qëllimin e hyrjes së tyre në bazën ushtarake.