Shoqata patriotike Çamëria “Hasan Tahsini” ka reaguar pas ekspozimit të portretit të Napoleon Zervës në Galerinë e Artit në Derviçian, duke e cilësuar këtë veprim si një provokim ndaj shqiptarëve.
Në reagimin e saj, shoqata ngre pikëpyetje mbi arsyet e nderimit të komandantit grek në territorin e Republikës së Shqipërisë, duke e lidhur figurën e Zervës me masakrat ndaj popullsisë civile shqiptare, dëbimin e shqiptarëve të Çamërisë nga trojet e tyre dhe pasojat që, sipas saj, këto ngjarje kanë lënë ndër breza.
Shoqata i referohet edhe ligjit nr. 7839, datë 30.6.1994, me të cilin Kuvendi i Shqipërisë e shpalli 27 qershorin në kalendarin kombëtar si “Dita e gjenocidit ndaj shqiptarëve të Çamërisë nga shovinistët grekë”. Ligji u shpall me dekretin e Presidentit nr. 885, datë 12.7.1994.
Sipas Shoqatës Çamëria “Hasan Tahsini”, është kontradiktore që shteti shqiptar të përkujtojë viktimat çame dhe, në të njëjtën kohë, në territorin e tij të ekspozohet për nderim figura e një komandanti që shoqata e lidh me masakrat dhe dëbimin e popullsisë çame.
“Nderimi i Zervës përçon një mesazh që bie ndesh me këtë njohjen zyrtare të gjenocidit grek nga parlamenti, ndërsa shqiptarët përkujtojnë viktimat, në Derviçian i jepet vend nderi figurës që simbolizon tragjedinë e tyre.
Ky është një provokim që nuk mund të relativizohet si zgjedhje artistike dhe as të kalojë në heshtje nga institucionet shqiptare dhe opinioni publik në Shqipëri.
Arti dhe kultura nuk mund të përdoren për të rehabilituar figura përgjegjëse për krime ndaj shqiptarëve. Nderimi i tyre cënon dinjitetin e viktimave, pasardhësve të tyre dhe dëmton bashkëjetesën e miqësinë ndërmjet popujve”, thuhet në reagim.
Shoqata i ka bërë thirrje kryetarit të Bashkisë Dropull që të heqë menjëherë portretin e Zervës nga ekspozimi dhe të japë një shpjegim publik për përzgjedhjen e tij.
Po ashtu, ajo i kërkon qeverisë shqiptare që, përmes institucioneve kompetente, të nisë një hetim për të sqaruar rrethanat e ekspozimit, si dhe për të identifikuar personat që kanë propozuar, miratuar apo mundësuar vendosjen e portretit.
“I bëjmë thirrje qeverisë shqiptare të nisë, përmes institucioneve kompetente, një hetim të plotë për të sqaruar rrethanat, për të identifikuar personat që kanë propozuar, miratuar dhe mundësuar këtë ekspozim, si dhe për të nxjerrë përgjegjësitë institucionale dhe ligjore që rezultojnë.
Respekti për minoritetin grek dhe të drejtat e tij është i padiskutueshëm. Pikërisht mbrojtja e bashkëjetesës kërkon që përgjegjësia për këtë veprim të identifikohet, dhe të mos rëndojë mbi minoritetin grek por mbi emrat konkret të cilët provojnë rëndë gjakun e shqiptarëve të masakruar nga bandat e shoviniste të Zervës”, përfundon reagimi.