Kreu i “Shqipëria Bëhet”, Adriatik Lapaj, ka komentuar protestën e 131-të të zhvilluar sot përpara Kuvendit, në ditën kur Parlamenti pritet të votojë reformën territoriale.
I ftuar në News24, Lapaj deklaroi se numrat e protestuesve pritet të rriten sërish, duke e përshkruar lëvizjen qytetare si një proces që mund të aktivizohet në momente të ndryshme.
Sipas tij, pushteti po përdor metoda për të frenuar zgjerimin e protestës. Lapaj pretendoi se në turmë janë infiltruar persona që, sipas tij, veprojnë për të neutralizuar veprimet e protestuesve.
“Pushteti po përdor ca metoda. Duke fituar kohë infiltron agjentë të shërbimit, të cilët në një pjesë bërtasin më shumë se edhe protestuesit, por neutralizojnë çdo hap të mëtejshëm”, deklaroi Lapaj.
Ai hodhi akuza edhe ndaj mënyrës së menaxhimit të protestave nga Policia, duke pretenduar se në varësi të numrit të pjesëmarrësve përdoren struktura të ndryshme të forcave të rendit.
Lapaj foli gjithashtu për pretendime lidhur me përfshirjen e personave me precedentë kriminalë në strukturat drejtuese të Policisë, duke deklaruar se një ditë ata do të japin llogari për veprimet e tyre.
“Një ditë Edi Rama do iki. Do përgjigjen personalisht. Do përballen me ligjin”, tha ai.
Në pjesën tjetër të intervistës, Lapaj u ndal te pjesëmarrja në protesta, duke kundërshtuar çdo përpjekje për ta kufizuar atë vetëm te një grup i caktuar qytetarësh.
Sipas tij, protesta duhet të jetë e hapur për të gjithë dhe të mos funksionojë mbi përjashtime apo kufizime.
“Sheshi është i të gjithëve. Jam kundër përjashtimeve. Sa kohë protesta është në flamurin kombëtar dhe kauzë e përbashkët”, u shpreh Lapaj.
