Deputeti i Partisë Socialiste, Erion Braçe, ishte një nga zërat më kritikë brenda PS-së ndaj reformës territoriale, por në seancën plenare votoi pro saj.
Pas votimit, Braçe deklaroi se vijon të jetë kundër hartës së re, pavarësisht votës së tij në Kuvend.
I pyetur nga gazetarët për arsyen e këtij qëndrimi, ai tha se do ta shpjegojë vendimin një ditë më vonë.
“Jam kundër, do e sqaroj nesër”, tha Braçe teksa po largohej nga Kuvendi.
Gazetari: Ç’u bë, zoti Braçe, reformën territoriale…
Erion Braçe: Jam kundër, po prapë reformën…
Gazetari: Pse votuat, pro, zoti Braçe?
Erion Braçe: E shpjegoj nesër.
Gazetari: E konsideruat këtë ditën më të vështirë? Pse vendoset në momentin e fundit të votoni pro?
Erion Braçe: …qytetarët…
Gazetari: Pse vendosët që në momentin e fundit të votoni pro, ju…?
Erion Braçe: Jam kundër, edhe një herë. Jam kundër kësaj harte…
Gazetari: Por nuk zgjodhet qytetari, zgjodhët partinë.
Erion Braçe: Jo, kam zgjedhur eksaktësisht qytetarin.
Projektligji për reformën territoriale parashikon uljen e numrit të bashkive në Shqipëri nga 61 në 46. Sipas hartës së propozuar, 15 bashki do të humbasin statusin si njësi më vete dhe do t’i bashkohen bashkive të tjera.
-
Fushë-Arrëzi i bashkohet Pukës.
-
Klosi i bashkohet Matit.
-
Rrogozhina i bashkohet Kavajës.
-
Dimali i bashkohet Beratit.
-
Poliçani i bashkohet Beratit.
-
Patosi i bashkohet Fierit.
-
Divjaka i bashkohet Lushnjës.
-
Selenica i bashkohet Vlorës.
-
Maliqi i bashkohet Korçës.
-
Këlcyra i bashkohet Përmetit.
-
Memaliaj i bashkohet Tepelenës.
-
Libohova i bashkohet Gjirokastrës.
-
Cërriku i bashkohet Elbasanit.
-
Belshi i bashkohet Elbasanit.
-
Përrenjasi i bashkohet Librazhdit.
