Toni Kroos po përgatitet të nisë zyrtarisht karrierën si trajner. Ish-mesfushori i Real Madridit, tashmë 36 vjeç, ka nisur procedurat pranë Federatës Spanjolle të Futbollit për t’u regjistruar në një kurs të posaçëm për trajnerët që kanë qenë futbollistë profesionistë.

Gjermani e ka bërë tashmë hapin e parë drejt këtij objektivi, pasi zotëron një diplomë trajneri që i lejon të drejtojë skuadra deri në kategorinë e tretë. Megjithatë, për të marrë drejtimin e një ekipi të nivelit të parë, Kroos duhet të pajiset ende me licencën përkatëse.

Nëse gjithçka shkon sipas planit, ish-futbollisti mund të ulet në një stol të rëndësishëm që në sezonin 2027-2028. Kështu, pas një karriere të jashtëzakonshme në fushën e lojës, Kroos po përgatitet të nisë një kapitull të ri në futboll, këtë herë nga pankina.

Gjermani i dha fund karrierës si futbollist në vitin 2024, pas triumfit me Real Madridin në Ligën e Kampionëve dhe pjesëmarrjes me Gjermaninë në Kampionatin Europian. Tashmë, synimi i tij është të rikthehet në qendër të vëmendjes së futbollit, duke provuar veten në rolin e trajnerit.