Aldo (Aleksandër) Baho, 37 vjeç, është arrestuar në Asti të Italisë, me qëllim ekstradimin drejt Shqipërisë.
Ai ishte shpallur në kërkim ndërkombëtar, pasi dyshohet se ka ndërmjetësuar për një vrasje të mbetur në tentativë, në kuadër të një grupi kriminal.
Sipas Policisë së Shtetit, Gjykata e Posaçme Kundër Korrupsionit dhe Krimit të Organizuar i ka caktuar Bahos më 29 shtator 2026 masën e sigurisë “Arrest në burg”, për veprat penale “Vrasja”, mbetur në tentativë, kryer në kuadër të grupit të strukturuar kriminal, “Mbajtja pa leje dhe prodhimi i armëve, armëve shpërthyese dhe municionit”, si dhe vepra të tjera që lidhen me aktivitetin e grupit të strukturuar kriminal.
Hetimet dyshojnë se në vitin 2022, Baho ka ndërmjetësuar për vrasjen e shtetasit L. M., ngjarje që mbeti në tentativë.
Arrestimi u bë në kuadër të operacionit ndërkombëtar “The Wanted”, falë bashkëpunimit mes specialistëve të Policisë së Shtetit dhe shërbimeve të Guardia di Finanza-s në Pisa të Italisë.
Ndërkohë, Interpol Tirana dhe Interpol Roma po vijojnë procedurat për ekstradimin e 37-vjeçarit drejt Shqipërisë.
