Mjaftojnë pak minuta shi, përmbytet rruga problematike mes dy lagjeve të Bulqizës
Vetëm pak minuta reshje shiu kanë mjaftuar që rruga mes dy lagjeve të qytetit të Bulqizës të mbulohet nga uji, duke vështirësuar lëvizjen e këmbësorëve dhe automjeteve.
Problemi përsëritet edhe këtë vit, njësoj si vitin e kaluar, për shkak të pamundësisë së kanalit ujëmbledhës që vjen nga Qafa e Buallit për të përballuar prurjet e mëdha të ujit që grumbullohen në të dyja anët e luginës.
Situata më problematike është krijuar në hyrje të terminalit të autobusëve, ku grumbullimi i ujit ka penguar qarkullimin normal.
Drejtuesit e automjeteve thonë se kjo situatë përsëritet sa herë ka reshje shiu, ndërsa kërkojnë ndërhyrje konkrete për zgjidhjen përfundimtare të problemit.
“Akoma pa rënë shi, shumë probleme. Ka gjysmë ore që ka rënë shi, u bllokua përnjëherë. Ka 35 vite që nuk merren masa.”, është shprehur një drejtues mjeti.
Probleme nga reshjet janë raportuar edhe në Rrugën e Arbrit, pranë urës që lidh dy lagjet e Bulqizës, ku prurjet e ujit kanë rikthyer shqetësimet për infrastrukturën dhe menaxhimin e ujërave të shiut.
/vizionplus.tv
