Zgjedhjet në UEFA, Ceferin merr vendimin

Në mbledhjen e UEFA-s “Top Executive Programme” (TEP) e zhvilluar sot në Berlin, Presidenti i UEFA-s, Aleksander Ceferin, u bëri me dije presidentëve dhe sekretarëve të përgjithshëm të të 55 federatave anëtare të UEFA-s se do të kandidojë për një mandat të fundit dhe do të vijojë të drejtojë organizatën edhe pas vitit 2027.

Në këtë mbledhje mori pjesë edhe Presidenti i FSHF, Armand Duka.

Gjatë muajve të fundit, të 55 federatat anëtare i kishin kërkuar në mënyrë unanime që të rishikonte vendimin e mëparshëm për të mos kërkuar një mandat të ri. Ceferin ka pranuar tashmë këtë kërkesë dhe ka konfirmuar synimin për të kandiduar për rizgjedhje në Kongresin e 51-të të Zakonshëm të UEFA-s, që do të zhvillohet në Astana, Kazakistan, më 22 prill 2027.

Vendimi i tij vjen gjithashtu pas shprehjes së mbështetjes dhe inkurajimit nga aktorë të tjerë të futbollit europian.

“Dua të falënderoj federatat anëtare për besimin e tyre. Kemi përballuar sfida të jashtëzakonshme gjatë viteve të fundit dhe i kemi përballuar ato si një ekip i vetëm. Ka ende punë të rëndësishme përpara dhe, për këtë arsye, kam pranuar kërkesën e tyre. Ambicia ime mbetet e njëjtë: të vijojmë ta mbajmë futbollin europian të bashkuar, ta bëjmë lojën tonë më të fortë dhe ta lëmë UEFA-n të përgatitur për gjeneratën e ardhshme. Jam gjithashtu thellësisht mirënjohës ndaj familjes sime. Ky vendim është shumë i rëndësishëm dhe nuk do të mund ta kisha marrë pa mirëkuptimin dhe mbështetjen e tyre.”

Futbolli europian kërkon reforma dhe lidership të ri në FIFA

Takimi u përqendrua gjithashtu tek e ardhmja e qeverisjes dhe lidershipit të FIFA-s.

Pas kërkesës për ndryshime themelore gjatë muajve të fundit, UEFA dhe të gjitha federatat kombëtare, me përjashtim të Federatës së Futbollit të Azerbajxhanit, ranë dakord në Berlin për një drejtim të qartë lidhur me reformimin e FIFA-s.

Propozimet për reformën, të mbështetura në Berlin, janë paraqitur në aneksin e këtij publikimi.

Federatat anëtare të UEFA-s përsëritën se kanë humbur besimin te lidershipi aktual i FIFA-s. Reforma institucionale, më vete, nuk do të jetë e mjaftueshme. FIFA-s i nevojitet gjithashtu një lidership i ri: një figurë e respektuar dhe bashkuese, me rrënjë të forta në futboll, me vizionin dhe përvojën për të udhëhequr, me aftësinë për të gëzuar besimin në të gjitha rajonet dhe me një angazhim të qartë ndaj zhvillimit, reformës, integritetit dhe pavarësisë.

Diskutimet për reformën dhe të ardhmen e lidershipit të FIFA-s do të vijojnë mes federatave kombëtare të UEFA-s, si edhe me homologët e tyre në të gjithë botën e futbollit.

Një tjetër takim i 55 federatave anëtare të UEFA-s do të zhvillohet përpara datës 17 nëntor 2026.