Një nuse britanike ka realizuar ëndrrën e saj të fëmijërisë, duke bërë një hyrje të pazakontë në ceremoninë e martesës: mbi lopën e saj të preferuar. Victoria Lee, 37 vjeçe, mbërriti në kishë e hipur mbi një lopë të racës zvicerane, të quajtur “White Chocolate Button”, përpara se të shkëmbente betimet martesore me bashkëshortin e saj, Mike Lee, 40 vjeç, të shtunën. Fermerja tregoi se kjo hyrje e veçantë ishte diçka që e kishte ëndërruar që kur ishte vetëm 10 vjeçe.
“Ishte pikërisht ajo që kisha ëndërruar gjithmonë. Ishte vërtet e jashtëzakonshme”, u shpreh Victoria. Ajo shtoi se, megjithëse është e pazakontë të hipësh mbi një lopë në një ceremoni martese, nuk sheh ndonjë ndryshim të madh nga tradita e hyrjes mbi kalë.
Sipas saj, edhe lopa ishte sjellë shumë mirë dhe e kishte përjetuar gjithçka me qetësi.
“Nuk do të kishte qenë dasma ime nëse nuk do të kishte pasur një lopë aty”, tha ajo, duke theksuar se kafshët e fermës janë pjesë e familjes dhe e jetës së tyre.
Victoria u transportua fillimisht me traktor drejt kishës Holy Cross, në Mark të Somersetit, në Angli. Pjesën e fundit të rrugës e përshkoi mbi lopën e saj të dashur, e cila ishte zbukuruar me një kurorë të posaçme me lule. Nusja, nënë e katër fëmijëve, hyri në kishë e shoqëruar nga shoqërueset e saj dhe familjarët. Udhëtimi mbi lopë zgjati vetëm 30 sekonda, por, siç tregoi ajo, ishte një moment që do ta mbajë mend gjatë. Martesa e çiftit u zhvillua në përvjetorin e tyre të dhjetë, duke e bërë këtë ditë edhe më domethënëse për ta. Për Victorian, ceremonia ishte dëshmi e dashurisë së saj për kafshët dhe e dëshirës për ta bërë ditën e saj të veçantë pikërisht sipas ëndrrës së fëmijërisë.
