Kërkesa për përjashtimin e tij, Bardhi: Jo 60 ditë, por bëjini 4 vjet! Shkelni rregulloret dhe Kushtetutën

Kreu i Grupit Parlamentar i Partisë Demokratike, Gazment Bardhi përmes një postimi në “Facebook” ka ndarë pamje nga debati i zhvilluar në Kuvend pas miratimit të reformës territoriale. Bardhi bashkëngjitur me pamjet ka komentuar kërkesën nga Grupi Parlamentar i PS për përjashtimin e tij me 60 ditë nga Kuvendi. Sipas tij, kërkesa duhet të bëhet për 4 vite. Ai shtoi se qeveria shkel rregulloret dhe Kushtetutën.

“Jo 60 ditë, por bëjini 4 vjet! Shkelni rregulloret dhe Kushtetutën! Bëni gjithçka që keni në dorë. Prapëseprapë, frikën e Edi Ramës nuk keni për ta zhdukur dot”, shkruan ai.

Bardhi gjithashtu shton se kryeministri Edi Rama është personi që ka braktisur dhe dhunuar prej 13 vitesh qytetarët.

“Është i vetmi kryeministër në botë që shkon në Kuvend për të votuar, i rrethuar nga 40 efektivë të Gardës së Republikës. Sepse ai e di më mirë se kushdo se llogaritë nuk i ka me deputetët e opozitës, por me qytetarët, të cilët i ka braktisur dhe i ka dhunuar prej 13 vitesh”, shkruan Bardhi.