Një skulpturë satirike që paraqet presidentin amerikan Donald Trump të zhveshur ka nxitur debate dhe reagime të shumta në Parlamentin Evropian në Strasburg të Francës. Disa politikanë kanë kërkuar largimin e saj, duke e cilësuar ekspozimin si të papërshtatshëm për institucionin.
Vepra, e titulluar “Murtaja e Portokalltë”, u prezantua të martën nga artisti danez Jens Galschiot. Instalacioni, 2.6 metra i lartë, paraqet Trumpin të mbuluar me fletë ari, të ulur mbi shpatullat e një burri të dobët, ndërsa mban një shkop golfi dhe peshoren e drejtësisë.
Mesazhi shoqërues i skulpturës përmban një kritikë simbolike ndaj pushtetit dhe barrës që ai mund t’u imponojë të tjerëve: “Jam ulur mbi shpinën e një burri. Ai po fundoset nën barrën time; do të bëj gjithçka për ta ndihmuar. Përveçse të zbres nga shpina e tij”.
Instalacioni ka shkaktuar reagime edhe në nivel politik. Kryeministri sllovak Robert Fico kërkoi të enjten heqjen e tij, duke e cilësuar skulpturën si një shenjë të rënies së Bashkimit Evropian.
Përmes një reagimi në platformën X, Fico theksoi se, pavarësisht mospajtimeve me politikat e presidentit amerikan, respekti dhe dialogu mes partnerëve duhet të mbeten parime themelore të marrëdhënieve ndërkombëtare.
Ai ngriti gjithashtu pikëpyetje nëse institucioni evropian do të pranonte paraqitje të ngjashme satirike ndaj presidentit francez Emmanuel Macron apo kancelarit gjerman Friedrich Merz, duke këmbëngulur se vepra duhet të largohet nga ambientet e Parlamentit.
Kundërshtime kanë shprehur edhe disa eurodeputetë. Eurodeputetja belge Barbara Bonte e cilësoi skulpturën si “turp”, ndërsa eurodeputeti hungarez Erno Schaller-Baross e kritikoi ekspozimin e saj si hipokrizi dhe si një veprim të papërshtatshëm për Parlamentin Evropian.
Nga ana tjetër, eurodeputeti irlandez Barry Cowen u shpreh se kundërshtimi ndaj politikave të Trumpit nuk e përjashton mundësinë që skulptura të konsiderohet e pamend dhe e kundërshtueshme. Ai bëri të ditur se i kishte drejtuar një letër Parlamentit për të shprehur kundërshtimin e tij.
Ndërkohë, eurodeputeti danez Per Clausen, i cili e ftoi artistin Jens Galschiot për të ekspozuar veprën, ka dalë në mbrojtje të instalacionit.
Polemika rreth skulpturës ka rikthyer në vëmendje debatin mbi kufijtë e satirës politike, lirinë artistike dhe përshtatshmërinë e veprave provokuese brenda institucioneve evropiane.