Begaj dekoron 2 senatorë amerikanë me 'Urdhrin Suprem të Shqiponjës'

Presidenti i Republikës, Bajram Begaj, priti pasditen e sotme në një ceremoni zyrtare në Pallatin e Brigadave dy senatorët e Shteteve të Bashkuara të Amerikës, Jeanne Shaheen dhe Dick Durbin.

Begaj i dekoroi senatorët me titullin e lartë "Komandar i Urdhrit Suprem të Shqiponjës".

Senatorët shoqëroheshin në këtë takim nga Ambasadori i SHBA-ve në Tiranë, Eric Wendt.

Siç bëhet me dije përmes një njoftimi nga Zyra e Shtypit e Presidencës, gjatë ceremonisë së dekorimit, Begaj vlerësoi kontributin e veçantë të senatorëve amerikane në forcimin e partneritetit strategjik ndërmjet Shqipërisë dhe Shteteve të Bashkuara të Amerikës, si dhe mbështetjen e vazhdueshme për integrimin euroatlantik të Shqipërisë, paqen, sigurinë dhe stabilitetin në Ballkanin Perëndimor./CNA