Ben Affleck ka sqaruar më në fund një nga pyetjet që ka shoqëruar filmin “Gone Girl” për më shumë se një dekadë: nëse përdori protezë gjatë skenës së famshme të dushit.
Aktori 54-vjeçar e konfirmoi në një intervistë për revistën “Variety” se skena e vitit 2014 u realizua pa përdorimin e një proteze. I pyetur drejtpërdrejt për këtë çështje, ai u përgjigj:
Nuk përdora asnjë protezë.
Affleck shtoi se e vetmja herë kur kishte përdorur një protezë gjatë karrierës së tij në film ishte në dramën “Hollywoodland”, të vitit 2006, ku mbante një hundë artificiale për rolin e tij.
Në “Gone Girl”, aktori interpreton Nick Dunne, një burrë që bëhet i dyshuari kryesor pas zhdukjes misterioze të bashkëshortes së tij, Amy, e luajtur nga Rosamund Pike. Skena e dushit, ku personazhi i Affleck shfaqet i zhveshur, u bë një nga momentet më të diskutuara të filmit.
Filmi psikologjik, i drejtuar nga David Fincher dhe i bazuar në romanin e Gillian Flynn, u publikua në vitin 2014 dhe pati sukses të madh në kinema, duke arkëtuar rreth 370 milionë dollarë në mbarë botën.
Affleck kishte folur edhe më parë me humor për xhirimin e kësaj skene. Gjatë ceremonisë së Hollywood Film Awards në vitin 2014, ai tregoi se regjisori Fincher e kishte siguruar fillimisht se kamera nuk do të zbulonte shumë.
Aktori ka shprehur vazhdimisht vlerësimin e tij për Fincherin, duke e cilësuar bashkëpunimin me të si një nga privilegjet më të mëdha të jetës së tij profesionale. Në një intervistë të fundit, ai tha se kishte qenë i gatshëm të bënte gjithçka për regjisorin, madje edhe të zhvishej para kamerave.
Pas 12 vitesh spekulimesh, deklarata e Affleck duket se i ka dhënë fund debatit rreth një prej skenave më të përfolura të filmit.
