IGJEUM: Fundjava me reshje në disa qarqe, vërshime uji në zonat urbane

Instituti i Gjeoshkencave ka ndarë një parashikim për kushtet e motit për fundjavën.

Sipas të dhënave, orët e mbetura të së premtes dhe dita e shtunë do të shoqërohen me reshje shiu mesatare deri në intensive në disa qarqe të vendit, ndërsa nuk do të mungojnë as problematikat e ndryshme, si rrëshqitjet e dherave dhe vërshimet e ujit në qytete.

Ndërkohë, temperaturat minimale dhe maksimale të ajrit pritet të shënojnë ndryshime.

Reshjet:

Sot pasdite (e premte, datë 9) dhe nesër (e shtunë, datë10) priten reshje mesatare deri lokalisht intensive në qarqet Shkodër dhe Lezhë, ndërsa në qarqet Durrës dhe Vlorë priten reshje mesatare. Në qarqet Kukës, Dibër, Tiranë dhe Elbasan priten reshje të dobëta deri lokalisht mesatare.

Në qarqet e tjerë priten reshje të dobëta. Në shumicën e qarqeve reshjet pritet të jenë në formë shtrëngate.

Shtrëngatat dhe intensiteti i lartë i reshjeve, mund të krijojnë probleme të ndryshme, si rrëshqitje të dherave dhe vërshime të ujit në zonat urbane, në varësi të sistemit të kanalizimeve në qarqet Shkodër, Lezhë dhe Vlorë.

Temperaturat:

Nesër temperaturat minimale dhe maksimale të ajrit pritet të arrijnë:

në bregdet: 18 / 23 °C

në vendet e ulëta: 17 / 24 °C

në vendet malore: 11 / 21 °C

Era:

Sot dhe nesër, era pritet të fryjë e lehtë deri mesatare, ndërsa në bregdet deri e fortë./CNA