Pas Francës, protestat e studentëve dhe punonjësve janë përhapur edhe në Belgjikë. Mijëra persona dolën në rrugët e Brukselit më 9 tetor, duke iu bashkuar grevës kombëtare të sindikatave kundër masave buxhetore të qeverisë. Sipas Reuters, marshimi u ndoq nga rreth 30 mijë pjesëmarrës, ndërsa greva shkaktoi ndërprerje në transportin publik dhe udhëtimet ajrore, si dhe preku funksionimin e shkollave dhe çerdheve.

Protestuesit kundërshtojnë shkurtimet buxhetore që, sipas sindikatave, rëndojnë mbi punonjësit, pensionistët dhe familjet me të ardhura të ulëta. Studentët, nga ana e tyre, kërkojnë arsim më të përballueshëm dhe kundërshtojnë rritjen e tarifave të studimit, klasat e mbipopulluara dhe vështirësitë në sigurimin e materialeve mësimore.

Në qendër të Brukselit, të rinjtë mbanin pankarta me mbishkrimet ‘E lashë mësimin për të mbrojtur arsimin’ dhe ‘Arsimi është e drejtë, jo privilegj’.

Një nga shqetësimet kryesore është rritja e kostove të arsimit të lartë në komunitetin frankofon të Belgjikës. Sipas ‘The Brussels Times’, sistemi i ri parashikon tarifa prej 374, 835 dhe deri në 1,194 euro në vit, në varësi të kategorisë financiare të studentit, ndërsa përfituesit e bursave përjashtohen nga pagesa. Studentët paralajmërojnë se kostot më të larta mund ta bëjnë arsimin e lartë të paarritshëm për të rinjtë nga familjet me më pak mundësi financiare.

 ‘Nuk na marrin fare parasysh dhe askush nuk duket se e kupton që është e vështirë edhe për ne, si për punonjësit, ashtu edhe për studentët. Prandaj, duhet vërtet t’u kushtohet shumë më tepër vëmendje të rinjve. Edhe ne po hasim vështirësi, e megjithatë jemi e ardhmja e këtij vendi. Kështu që, nëse nuk na ndihmoni tani qeveria, nuk do të na ndihmoni kurrë’, shprehet një prej studentëve në materialin e transmetuar.

Sacha Huyghebeart, një nxënëse 17-vjeçare e shkollës së mesme, kritikoi qasjen e qeverisë ndaj shkurtimeve buxhetore.

‘Personalisht, ndihem vërtet sikur qeveria po tallet me ne, duke na qeshur hapur në fytyrë. Mendoj se kjo është vërtet e turpshme; ky është mendimi im si student. Ata do t’i vënë në shënjestër të rinjtë dhe ata me më pak mundësi financiare, ndonëse pikërisht këtë nuk duhet ta bënin. Ne duhet t’i ndihmojmë ata; duhet të ndihmojmë pakicat e megjithatë, ja ku jemi, duke vënë në shënjestër pakicat për të bërë shkurtime buxhetore, dhe këtë e konsideroj të turpshme.’

Përfaqësuesja e sindikatës, Fabienne Meulemans, e mirëpriti pjesëmarrjen e studentëve në protestë, duke theksuar rëndësinë e përfshirjes së brezave të rinj. Sipas saj, studentët përfaqësojnë fuqinë punëtore të së ardhmes, ndërsa vështirësitë financiare po ua vështirësojnë qasjen në arsim.

Protesta e Brukselit u shoqërua edhe me incidente. Sipas Reuters, një grup protestuesish të maskuar u përplasën me policinë, hodhën sende drejt efektivëve dhe shkaktuan zjarre e dëme në pronën publike. Policia përdori gaz lotsjellës dhe topa uji, ndërsa 21 persona u ndaluan ose u arrestuan, mes tyre 13 të mitur.

Kryeministri belg, Bart De Wever, ka mbrojtur nevojën për masa të vështira buxhetore, duke argumentuar se ato duhen për të shmangur një rritje të mëtejshme të borxhit dhe kostove të interesave që do të rëndonin mbi brezat e ardhshëm.

Pjesëmarrja e studentëve në protestat e Belgjikës lidhet pjesërisht me lëvizjet e ngjashme në Francën fqinje. Në Belgjikë, kundërshtitë përqendrohen te kostot e arsimit, kushtet në shkolla dhe reformat që, sipas studentëve, rrezikojnë ta kufizojnë më tej aksesin në arsimin e lartë.