Gjatë një interviste në emisionin “Çdo Kënd”, Tabaku foli për lidhjen e saj me kryeqytetin dhe përvojën e mëparshme në drejtimin e bashkisë, ku ka shërbyer si nënkryetare.
Ajo tha se Tirana mbetet një pasion i rëndësishëm për të, por theksoi se për momentin dëshiron të përqendrohet te angazhimi politik në Kuvend.
“E dua me gjithë shpirt Tironën dhe, në qoftë se ka një gjë të dytë që e kam me shumë pasion, është politika. Aq më mirë kur mblidhen të dyja bashkë”, u shpreh Tabaku.
Megjithatë, deputetja la të kuptohet se rikthimi në administrimin e kryeqytetit nuk është synimi i saj aktual. Sipas saj, fakti që emri i saj përmendet si një profil i mundshëm për këtë garë është kënaqësi, por ajo e konsideron të përfunduar atë etapë.
“Unë e kam kaluar dhe e kam ezauruar atë fazë. Unë sot jam në këtë përballje në parlament sepse aty doja të isha”, deklaroi ajo.
Tabaku shtoi se përzgjedhja e kandidatit të Partisë Demokratike për Bashkinë e Tiranës do të vijojë si proces brenda partisë, ndërsa preferenca e saj personale mbetet të përmbushë mandatin për të cilin është votuar.
