Amal dhe George Clooney kanë tërhequr vëmendjen gjatë ceremonisë së çmimeve The Albies, të organizuar më 9 tetor në Muzeun e Historisë Natyrore në Londër.
Për këtë mbrëmje, Amal zgjodhi një fustan Gucci me shkëlqim, ku nuancat e argjendta ndërthureshin me ato të arta. Ajo e kompletoi pamjen me vathë të mëdhenj dhe një çantë të vogël të bardhë, ndërsa George u shfaq me një smoking klasik të zi.
Megjithatë, eventi nuk ishte vetëm një tjetër mbrëmje elegante e Hollywood-it. The Albies organizohet nga Clooney Foundation for Justice dhe vlerëson individë e organizata që punojnë për mbrojtjen e të drejtave të njeriut.
Çmimet mbajnë emrin e Albie Sachs, juristit dhe aktivistit të njohur kundër aparteidit në Afrikën e Jugut. Në edicionin e këtij viti u nderuan gazetarë, aktivistë dhe organizata nga vende të ndryshme.
Në mbrëmje morën pjesë edhe personazhe të njohur si Brad Pitt dhe Emily Ratajkowski, duke e kthyer ceremoninë në një nga eventet më të komentuara të javës.
Amal, e cila është avokate e specializuar në të drejtat e njeriut, ka qenë prej kohësh e angazhuar në këtë fushë. Për të dhe George, ceremonia është një mundësi për t’u dhënë vëmendje ndërkombëtare njerëzve që punojnë për drejtësinë. Amal Clooney shkëlqeu në tapetin e kuq, por mesazhi i mbrëmjes shkonte shumë përtej modës.
