Të blesh rroba të përdorura nuk shihet më vetëm si një mënyrë për të kursyer para. Për shumë të rinj, dyqanet vintage dhe veshjet second-hand janë kthyer në një mënyrë për të krijuar një stil më personal.
Sipas një artikulli të Moneycontrol, të publikuar më 10 tetor:
Kërkimet në Google për shprehjen “how to thrift” në Indi kanë shënuar një rritje prej 850%. Kjo tregon një interes të madh për mënyrën se si mund të gjenden dhe kombinohen veshjet e përdorura.
Në këtë ndryshim po ndikojnë edhe personazhet e njohur. Aktorja Sonam Kapoor ka folur për koleksionimin e veshjeve vintage, ndërsa Alia Bhatt ka promovuar idenë e rivendosjes së rrobave që i kemi veshur më parë.
Për një kohë të gjatë, moda u lidh me blerjen e vazhdueshme të koleksioneve të reja. Por tani një pjesë e konsumatorëve po kërkon alternativa që nuk gjenden lehtësisht në dyqanet tradicionale.
Një xhaketë vintage, një çantë e vjetër apo një palë xhinse të gjetura në një dyqan second-hand mund të krijojnë një kombinim më origjinal sesa një veshje e blerë nga koleksionet më të fundit. Përveç çmimit, rëndësi ka edhe ideja e përdorimit më të gjatë të veshjeve dhe reduktimit të mbetjeve tekstile. Dikur të blije rroba të përdorura ishte një zgjidhje ekonomike, tani për shumë të rinj është edhe një zgjedhje stili.
