“Ajo që duhet të ishte rezultat i viteve të studimit dhe punës kërkimore të studentit, po kthehet në produkt që blihet. Temat e diplomës po merren të gatshme nga studentët, kundrejt pagesës, ndërsa çmimi shkon deri në 400 euro”.
Nga një vëzhgim në rrjetet sociale shihen me dhjetëra faqe online, të cilat reklamojnë tema diplome, ndërsa pagesa varion në bazë të kërkesës së studentit dhe programit të studimit.
“Është në problematikë që tregon një plagë që e vuan sistemi arsimor. Së pari transmeton idenë që dija nuk ka vlerë, ajo që vlen është kartoni. Nxit konkurrencën e pandershme midis të rinjve që kanë bërë një punë të mirë dhe pjesës tjetër që e gjejnë gati. I lë të rinjtë në një boshllëk intelektual”, thotë Irsa Ruçi.
Pedagogët pohojnë mungesën e angazhimit të studentëve në fushën e kërkimit shkencor dhe kjo i çon ata drejt rrugëve më të lehta.
“E shikoj me studentët e mi një pjesë e madhe e tyre e kanë të vështirë të ndërtojnë një ese shkencore që mbledh informacione, është e rëndësishme që të jesh një kërkues I mire, jo vetëm një tekst shkrues i mirë”, thotë Irsa Ruçi.
Por si mund të shmanget fenomeni që ka gjetur gjithnjë e më shumë përhapje?
“Duhet bërë një plan pune me pedagogët udhëheqës. Nëse ti ke përgatitur një temë dhe thjeshtë e dorëzon në fund pa asnjë filtër kontrolli, atëherë plagjiatura ushqehet edhe më tepër”, thotë Irsa Ruçi.
Ekspertët e arsimit sugjerojnë ndryshimin e qasjes në universitete, në të cilat nuk duhet të prodhohen vetëm diploma, por të krijohen kushtet ngritjes së një sistemi bazuar në vlera./tvklan.al
