Sulmi i tretë me thikë në një shkollë në Poloni brenda një jave/ Tre persona të plagosur

Një 21-vjeçare është arrestuar në Poloni pasi plagosi me thikë tre persona në një shkollë në Varshavë. Sipas raportimeve, autorja e sulmit dyshohet se goditi me thikë një 17-vjeçare, ndërsa dy vajza të tjera përkatësisht 17 dhe 24 vjeçe, të cilat kishin shkuar në shkollë për të dorëzuar dokumentet e regjistrimit, mbetën të plagosura.

Ngjarja vjen një ditë pasi mijëra efektivë policie u angazhuan në shkolla në të gjithë Poloninë, pas dy sulmeve me thikë të ndodhura në fillim të javës, njëri prej të cilëve përfundoi me vdekjen e një punonjëseje të shkollës. Një zëdhënës i policisë së Varshavës tha se autoritetet nuk mund të konfirmonin nëse sulmi i fundit kishte lidhje me dy incidentet e mëparshme.

Policia bëri të ditur se e dyshuara ishte nxënëse e shkollës, ndërsa hetimet paraprake kanë treguar se ajo nuk i njihte personat që plagosi. Autoritetet polake kanë shtuar masat e sigurisë në shkolla pas sulmeve me thikë të regjistruara më 7 dhe 8 tetor. Policia njoftoi se kishte arrestuar 76 persona gjatë operacionit të zhvilluar në institucionet arsimore në të gjithë vendin. 

Sipas mediave lokale, autoritetet kishin marrë informacione që sugjeronin se incidentet e kësaj jave mund të kishin lidhje me një sfidë në internet. Të mërkurën, një student 19-vjeçar sulmoi dhe plagosi nëntë persona në një shkollë profesionale në provincën Mazovia, në Poloninë qendrore. Një ditë më vonë, një punonjëse 37-vjeçare e një shkolle fillore u vra pasi një 15-vjeçar hyri në institucionin arsimor në Leszczydol-Noëiny, në veri të Varshavës.

Gjithashtu, ministri i Brendshëm, Marcin Kierëinski, deklaroi se një 17-vjeçar ishte ndaluar në qytetin Sierpc, në veriperëndim të Varshavës, pasi dyshohet se kishte deklaruar brenda ambienteve të shkollës se planifikonte të bënte diçka të rrezikshme dhe se synonte të lëndonte dikë. Autoritetet po vijojnë hetimet për të zbardhur rrethanat e ngjarjeve dhe për të përcaktuar nëse sulmet kanë ndonjë lidhje mes tyre. /CNA