Tragjedi në Pensilvani/ Vriten 9 persona me armë zjarri, mes viktimave dy fëmijë

Nëntë persona, mes tyre dy fëmijë, kanë humbur jetën nga të shtënat masive me armë zjarri në një banesë në qytetin Erie, në shtetin e Pensilvanisë, në SHBA. Autori i dyshuar i sulmit dyshohet se i ka dhënë fund jetës pas ngjarjes.

Sipas raportimeve të mediave lokale, policia u njoftua të premten pasdite, pasi dëshmitarët raportuan se kishin parë një person duke qëlluar me armë zjarri në rrugë, përpara se të hynte në një banesë. Dy gra u gjetën të vdekura në rrugë.

Më pas, autori u mbyll brenda banesës, ndërsa forcat e policisë rrethuan ndërtesën dhe i kërkuan të dilte. Gjatë kësaj kohe, u dëgjuan të shtëna të tjera me armë zjarri.

Kur efektivët hynë në banesë, gjetën disa viktima të tjera, si dhe autorin e dyshuar, i cili dyshohet se kreu vetëvrasje.

Në deklaratën zyrtare të zyrës së kryetarit të bashkisë së qytetit Erie thuhet se hetuesit kanë përcaktuar se të gjitha vdekjet kishin ndodhur përpara mbërritjes së efektivëve të policisë në vendngjarje.

Hetimet për zbardhjen e plotë të rrethanave dhe motivit të sulmit vijojnë. /CNA