Artizanati në Elbasan drejt zhdukjes, mjeshtrit pa mbështetje dhe të rinjtë larg traditës

Mjeshtëri të trashëguara brez pas brezi rrezikojnë të zhduken në Elbasan. Artizanët po përballen me kosto të larta, mungesë tregu dhe indiferencë nga shteti, ndërsa të rinjtë po i braktisin gjithnjë e më shumë këto profesione. Pavarësisht viteve të punës dhe përkushtimit, produktet e tyre nuk vlerësohen sa duhet, duke vënë në pikëpyetje mbijetesën e një tradite të vjetër.

Një nga sektorët më të prekur është poçaria, ku kostot e prodhimit dhe vështirësitë për sigurimin e materialeve të nevojshme e bëjnë edhe më të vështirë vijimin e aktivitetit. Proceset e punës kërkojnë kohë dhe mjeshtëri, por kërkesa e ulët në treg nuk u garanton artizanëve të ardhura të mjaftueshme.

Dikur të trashëguara brenda familjeve, këto profesione po humbasin interesin e brezit të ri, i cili po zgjedh alternativa të tjera punësimi. Kjo prirje rrezikon të ndërpresë zinxhirin e transmetimit të mjeshtërive tradicionale.

Artizanët thonë se mungesa e mbështetjes institucionale i detyron të përballojnë vetë çdo investim, pa pasur garanci për vazhdimësinë e punës. Ata kërkojnë ndihmë konkrete për të ruajtur traditën dhe për ta bërë artizanatin sërish tërheqës për të rinjtë.