Huthitë paralajmërojnë sulme të reja: Shmangni aeroportet saudite, përjashtim Meka dhe Medina

Rebelët Huthi në Jemen kanë përsëritur paralajmërimin për linjat ajrore, kompanitë e transportit, punonjësit e aeroporteve dhe udhëtarët, duke u bërë thirrje të shmangin aeroportet dhe hapësirën ajrore të Arabisë Saudite, për shkak të rrezikut të sulmeve të reja.

Zëdhënësi ushtarak i Huthive, Yahya Saree, deklaroi në një postim në rrjetin social X se aeroportet saudite mbeten të ekspozuara ndaj goditjeve të mundshme dhe mund të kthehen në objektiva të operacioneve të forcave të tij.

Megjithatë, ai bëri një përjashtim për aeroportet e Mekës dhe Medinës, duke deklaruar se këto dy qytete nuk përfshihen në paralajmërimin për sulme.

Saree paralajmëroi gjithashtu se Arabia Saudite do të mbajë përgjegjësi për pasojat e çdo përpjekjeje të dështuar për të interceptuar sulmet hyrëse.

“Një aeroport për një aeroport, një bllokadë për një bllokadë dhe përshkallëzim për përshkallëzim”, është parimi me të cilin, sipas zëdhënësit, Huthitë do të vijojnë fushatën e tyre deri në përmbushjen e objektivave.

Paralajmërimi vjen pas një vale sulmesh ndaj infrastrukturës aeroportuale saudite, përfshirë aeroportin ndërkombëtar “King Khalid” në Riad, ku një goditje e fundit shkaktoi 12 viktima dhe mbi 300 të plagosur, sipas raportimeve të autoriteteve saudite të aviacionit.

Përshkallëzimi i sulmeve ka shtuar shqetësimet për sigurinë e udhëtimeve ajrore në rajon, ndërsa disa kompani ajrore kanë anuluar ose pezulluar fluturimet drejt Riadit.