Presidenti Bajram Begaj mori pjesë në ceremoninë përmbyllëse të edicionit të 32-të të festivalit “Oda Dibrane”, ku vlerësoi rolin e këtij aktiviteti në ruajtjen e trashëgimisë kulturore dhe forcimin e lidhjeve mes shqiptarëve brenda dhe jashtë vendit.
Në fjalën e tij përshëndetëse, kreu i shtetit e cilësoi festivalin simbol të bashkimit të shqiptarëve nga të gjitha trevat dhe diaspora, duke theksuar rëndësinë e tij në promovimin e identitetit kombëtar.
Begaj u ndal edhe te mënyra se si duhet të ruhet trashëgimia kulturore, duke nënvizuar se traditat nuk mund të mbeten vetëm pjesë e së shkuarës, por duhet të vazhdojnë të jetojnë përmes brezave.
“Trashëgimia kulturore nuk është vetëm kujtim i së shkuarës dhe folklori nuk mund të jetë një muze që hapet disa herë në vit. Një traditë jeton vetëm kur këndohet, kërcehet, rrëfehet, mësohet dhe përcillet”, u shpreh Begaj.
Ai vlerësoi gjithashtu kontributin e diasporës në ruajtjen e identitetit kulturor, duke e cilësuar këtë të fundit si urën që lidh shqiptarët me vendlindjen.