Papa Leone XIV do t’i nënshtrohet një ndërhyrjeje kirurgjikale në ditët në vijim, pasi mjekët i kanë zbuluar një masë të lokalizuar në mushkëri. Sipas deklaratës së vetë Atit të Shenjtë, masa është zbuluar në një fazë shumë të hershme dhe mjekët e kanë konsideruar të nevojshme heqjen e saj.
Papa e bëri njoftimin të dielën, pas lutjes së Angelusit në Sheshin “Shën Pjetri”, duke falënderuar besimtarët për mbështetjen dhe lutjet e tyre.
“Mjekët më kanë gjetur një masë të lokalizuar në mushkëri. Është zbuluar në një fazë shumë të hershme dhe është e lokalizuar mirë. Ata e konsiderojnë të nevojshme ndërhyrjen dhe, duke ndjekur këshillën e tyre, kam vendosur të operohem për ta hequr. Operacioni është planifikuar për ditët në vijim. Ju falënderoj për afërsinë tuaj shpirtërore dhe mbështetem te lutjet tuaja”, u shpreh Papa.
Sipas Vatikanit, ndërhyrja do të kryhet në poliklinikën “Gemelli” në Romë. Zëdhënësi i Selisë së Shenjtë, Matteo Bruni, bëri të ditur se operacioni është planifikuar për ditët e para të javës së ardhshme, ndërsa qëndrimi në spital pritet të zgjasë rreth një javë.
Pas njoftimit, kryeministrja italiane Giorgia Meloni shprehu mbështetjen e saj personale dhe të qeverisë për Papën, duke i uruar forcë në përballimin e ndërhyrjes.
“Dëshiroj t’i shpreh Atit të Shenjtë afërsinë time personale dhe atë të qeverisë italiane për provën me të cilën do të përballet në ditët e ardhshme. Qetësia me të cilën foli gjatë Angelusit na jep zemër. Jam e bindur se edhe populli italian do t’i qëndrojë pranë me mbështetje dhe dashuri”, deklaroi Meloni.
Edhe presidenti i Dhomës së Deputetëve të Italisë, Lorenzo Fontana, i uroi Papës një ndërhyrje të suksesshme dhe shërim të shpejtë.