Gjykata Supreme e Mbretërisë së Bashkuar do të shqyrtojë më 17 mars 2027 apelin e Shqipërisë dhe të Sekretares së Shtetit për Punët e Brendshme, Shabana Mahmood, kundër vendimit që rrëzoi urdhrat për ekstradimin e pesë personave të dyshuar për përfshirje në vrasjen e biznesmenit Ardian Nikulaj.
Sipas Top Channel, një zëdhënës i Gjykatës Supreme konfirmoi se për shqyrtimin e çështjes është caktuar një ditë e plotë gjyqësore. Në proces janë të përfshirë Edmond Haxhia, Thomas Mithan, Harriet Bridgeman, Harry Simpson dhe Steven Hunt, të shpallur në kërkim nga Prokuroria e Lezhës.
Çështja lidhet me kërkesat e paraqitura nga Shqipëria për ekstradimin e pesë personave, të cilët dyshohet se kanë marrë pjesë në një plan që çoi në vrasjen e Nikulajt. Biznesmeni u vra në Shqipëri nga Ruben Saraiva, i cili u shpall fajtor për vrasjen dhe u dënua me burgim të përjetshëm.
Në kërkesat fillestare për ekstradim, autoritetet shqiptare iu referuan veprave penale të “Vrasjes për shkak të gjakmarrjes”, sipas nenit 78/a të Kodit Penal, dhe “Prodhimit dhe mbajtjes pa leje të armëve dhe municionit”, sipas nenit 278/1, në lidhje me nenin 25 për bashkëpunimin në kryerjen e veprës penale.
Megjithatë, gjatë shqyrtimit gjyqësor në Britani, kërkesat ndryshuan dhe ekstradimi u kërkua për veprën penale të “Vrasjes me paramendim”, sipas nenit 78 të Kodit Penal, në lidhje me nenin 25.
Gjykata e Westminsterit ia përcolli çështjet Sekretarit të Shtetit, i cili më pas urdhëroi ekstradimin e pesë personave drejt Shqipërisë. Por Gjykata e Lartë britanike pranoi apelimet dhe kërkesat për shqyrtim gjyqësor, duke vlerësuar se kishte mospërputhje mes veprave penale të përcaktuara në kërkesat fillestare dhe atyre për të cilat u urdhërua ekstradimi. Për këtë arsye, urdhrat e ekstradimit u shfuqizuan.
Shqipëria dhe Sekretarja e Shtetit e apeluan vendimin në Gjykatën Supreme të Mbretërisë së Bashkuar, e cila pranoi ta shqyrtojë çështjen.
Në qendër të procesit do të jetë çështja ligjore nëse, kur lëshon një urdhër ekstradimi sipas nenit 93 të Ligjit britanik për Ekstradimin të vitit 2003, Sekretari i Shtetit duhet të identifikojë veprën penale të përcaktuar në kërkesën fillestare, për të cilën personi kërkohet të ndiqet penalisht.