Kallas dënon sulmin në aeroportin e Riadit: Akt terrori

Shefja e politikës së jashtme të Bashkimit Evropian, Kaja Kallas, ka dënuar sulmin e fundit të rebelëve Huthi në aeroportin ndërkombëtar të Riadit, duke e cilësuar atë si një “akt të tmerrshëm terrori” dhe duke shprehur solidaritetin e BE-së me Arabinë Saudite.

“Sulmi i rebelëve Huthi në aeroportin ndërkombëtar të Riadit është një akt i tmerrshëm terrori. Nuk mund të ketë asnjë justifikim për sulme pa dallim ndaj civilëve dhe infrastrukturës civile”, shkroi Kallas të dielën në platformën X.

Ajo shprehu ngushëllimet e saj për familjet e viktimave dhe rikonfirmoi mbështetjen për Arabinë Saudite, ndërsa paralajmëroi se tensionet në rritje në rajon do të diskutohen të hënën nga ministrat e Jashtëm të BE-së.

Kallas theksoi gjithashtu rëndësinë e koordinimit mes operacionit detar të Bashkimit Evropian në Detin e Kuq, Aspides, dhe Koalicionit Shumëkombësh të Mbrojtjes Detare të udhëhequr nga Arabia Saudite.

Sipas autoritetit saudit të aviacionit civil, nga sulmi humbën jetën katër shtetas sauditë, dy shtetas të Bangladeshit dhe nga një shtetas i Shteteve të Bashkuara, Egjiptit, Jordanisë, Sirisë, Palestinës dhe Sudanit.

Të plagosurit po marrin trajtim mjekësor në spital, ndërsa disa prej tyre ndodhen në gjendje kritike.

Pas sulmit, autoritetet pezulluan përkohësisht operacionet në aeroport për të vlerësuar dëmet dhe për të verifikuar sigurinë e objekteve. Ndërprerja shkaktoi vonesa dhe anulime fluturimesh, ndërsa pasagjerëve iu kërkua të kontaktonin kompanitë ajrore përpara se të udhëtonin drejt aeroportit.