Shpërthimi në fabrikat e kompanisë “Motor Oil”, në Agioi Theodoroi të Greqisë, ka marrë një tjetër jetë.
50-vjeçari Dorian Hysa ndërroi jetë sot, duke e çuar në dy numrin e punëtorëve shqiptarë që humbën jetën nga aksidenti.
Sipas informacioneve të publikuara nga thriassio.gr, Hysa ishte shtruar në gjendje jashtëzakonisht kritike në Spitalin e Përgjithshëm “Thriasio” në Elefsinë.
Ai ishte i intubuar dhe kishte pësuar dëmtime të rënda në kokë, por, pavarësisht përpjekjeve të mjekëve, nuk arriti t’u mbijetonte plagëve ndërsa ka ndërruar jetë rreth orës 13:00.
Viktima e parë e aksidentit ishte 43-vjeçari Robert Cakaj, edhe ai shqiptar i cili ndërroi jetë në spital më 9 tetor.
Ndërkohë, autoritetet greke po hetojnë rrethanat e aksidentit, me fokus te masat e sigurisë gjatë punimeve të mirëmbajtjes në fabrikë.
Në kuadër të hetimeve, policia ka kryer edhe tre arrestime të reja të drejtuesve të kompanisë “Motor Oil”, të cilët dyshohet se kishin rol të drejtpërdrejtë në mbikëqyrjen e punimeve.
Aksidenti ka ngritur pikëpyetje mbi zbatimin e masave të sigurisë në vendin e punës, ndërsa hetimet pritet të hedhin dritë mbi shkaqet e ngjarjes tragjike dhe përgjegjësitë e mundshme.
