Kategoria e Parë/ Pogradeci mbron kryesimin, Besa fiton dhe bën “presion”

Katër ndeshjet e javës së pestë në Kategorinë e Parë nuk sollën surpriza, duke konfirmuar formën e mirë të skuadrave pretendente për kreun.

Besa e Kavajës fitoi me rezultatin 2-0 në shtëpi përballë Ilirisë, duke e zgjidhur takimin që në pjesën e parë.

Ndeshja u zhbllokua nga Danaj në minutën e 15-të, ndërsa Ruzgis dyfishoi shifrat në minutën e 36-të, rezultat ky që u administrua nga vendasit deri në fund. Me këtë fitore, kavajasit mbajnë vendin e dytë me 10 pikë të grumbulluara.

Ndërkohë, kryesimin e kampionatit vazhdon ta mbajë Pogradeci falë suksesit 0-2 në transfertën ndaj Korabit.

Pasi pjesa e parë u mbyll pa gola, liqenorët realizuan dy herë në të dytën me anë të Shanajt në minutën e 53-të dhe Lleshajt nga pika e penalltisë 10 minuta më vonë.

Në dy sfidat e tjera të kësaj jave, Kastrioti mposhti 2-0 Orikun falë dy golave të Mario Beshirajt, ndërsa përballja mes Burrelit dhe Besëlidhjes përfundoi në një barazim pa gola, duke bërë që skuadrat të ndajnë nga një pikë.