Rusia dhe Ukraina kanë arritur një marrëveshje për ndalimin e menjëhershëm të sulmeve ndaj infrastrukturës energjetike, sipas një njoftimi të presidentit amerikan Donald Trump, i cili u bëri thirrje të dyja palëve ta respektojnë armëpushimin.
“Armëpushimi në sektorin energjetik në luftën mes Rusisë dhe Ukrainës hyn në fuqi menjëherë. Të dyja palët kanë rënë dakord. Mos e shkelni!”, shkroi Trump në një postim.
Më herët, të dielën, presidenti ukrainas Volodymyr Zelensky deklaroi se Ukraina është e gatshme të ndalojë sulmet ndaj rafinerive ruse të naftës, me kusht që Moska të ndërpresë goditjet ndaj infrastrukturës energjetike ukrainase.
Deklarata e Zelenskyt erdhi pas kërkesës së Trumpit që Kievi t’i ndalte në mënyrë të njëanshme sulmet ndaj rafinerive ruse.
Të shtunën, presidenti amerikan akuzoi Ukrainën se, përmes sulmeve ndaj rafinerive të Rusisë, po kontribuon në rritjen e çmimeve të naftës dizel në SHBA. Ai paralajmëroi se Zelensky “duhet të ndalet, dhe menjëherë”.
Trump deklaroi gjithashtu se Ukraina duhet të zgjedhë një president të ri, duke pretenduar se Zelensky kishte pasur shumë mundësi për të arritur një marrëveshje me Moskën, por nuk i kishte shfrytëzuar ato.
Rritja e çmimeve të karburanteve, shqetësim për Trumpin
Rritja e menjëhershme e çmimeve ndërkombëtare të naftës dizel, pas shpërthimit të luftës me Iranin në shkurt, është shndërruar në një problem politik për Partinë Republikane të Trumpit.
Situata vjen në prag të zgjedhjeve të mesmandatit në SHBA, që do të mbahen muajin e ardhshëm. Në këto zgjedhje, demokratët mund të sigurojnë kontrollin e njërës ose të të dyja dhomave të Kongresit amerikan.
Ndërkohë, Zelensky përsëriti të dielën qëndrimin e Ukrainës se vendi është i gatshëm të ndalojë sulmet ndaj rafinerive ruse vetëm në kuadër të një uljeje të ndërsjellë të tensioneve.
Kjo, sipas tij, nënkupton që Rusia duhet të ndalojë gjithashtu sulmet ndaj infrastrukturës energjetike të Ukrainës.
Presidenti ukrainas theksoi se çdo marrëveshje e tillë duhet të shoqërohet me “garanci reale” për zbatimin e saj.
