Detajet/ Të martën mbahet konferenca ndërqeveritare Shqipëri-BE

Të martën e 13 tetorit do të mbahet konferenca e radhës ndërqeveritare mes Shqipërisë dhe Bashkimit Europian.

Në konferencën që do të mbahet në Luksemburg, delegacionin pritet ta kryesojë kryeministri Edi Rama.

Kjo do të jetë Konferenca e 10-të Ndërqeveritare Shqipëri-BE, e miratuar nga Komiteti i Përfaqësuesve të Përhershëm të Shteteve Anëtare të Bashkimit Evropian (COREPER).

Konferenca mbahet ndërsa pak ditë më parë, Shqipëria mbylli kapitullin e parë të negociatave me Bashkimin Europian.

Kapitulli 20 përfshin politikat dhe instrumentet që synojnë krijimin e një mjedisi më konkurrues, inovativ dhe të qëndrueshëm për biznesin. Në fokus të tij janë mbështetja e ndërmarrjeve të vogla dhe të mesme, përmirësimi i klimës së investimeve dhe forcimi i aftësisë së ekonomisë për t’u integruar në Tregun e Vetëm Evropian.

Ky kapitull përfshin gjithashtu masa për inovacionin, digjitalizimin, tranzicionin e gjelbër, zhvillimin e aftësive sipërmarrëse dhe rritjen e produktivitetit të sektorit privat, në përputhje me politikat dhe praktikat më të mira europiane./CNA