Çështja e 115 akuzave për shkelje të dyshuara të rregullave financiare ndaj Manchester Cityt vazhdon të mbajë në ten...
SOCIALE
Ku paguhen më mirë mësuesit në Evropë?
PiranjatPërditësimi i fundit 11 Tetor 2026, 17:42
Pagat e mësuesve në Evropë ndryshojnë ndjeshëm nga një vend në tjetrin, me diferenca që arrijnë pothuajse katërfishin. Sipas raportit “Education at a Glance 2026” të OECD-së, pagat mesatare vjetore të mësuesve të arsimit fillor në vitin 2025 varionin nga 18,669 euro në Turqi në 74,086 euro në Danimarkë. Megjithatë, renditja ndryshon kur merren parasysh kostot e jetesës dhe fuqia blerëse.
Analiza e Euronews krahason pagat e mësuesve në 28 sisteme arsimore evropiane. Të dhënat u referohen pagave mesatare vjetore bruto të mësuesve me kohë të plotë, të moshës 25–64 vjeç, duke përfshirë pagën bazë, bonuset, shpërblimet dhe pagesat e tjera të lidhura me punën.
Pas Danimarkës renditen Islanda, me 73,752 euro në vit, Irlanda me 69,747 euro, Gjermania me 69,453 euro dhe Austria me 65,851 euro.
Mbi 50 mijë euro në vit përfitojnë gjithashtu mësuesit në Norvegji (59,453 euro), komunitetin flamand të Belgjikës (59,105 euro), Irlandën e Veriut (57,838 euro), Skoci (57,619 euro), komunitetin frankofon të Belgjikës (55,689 euro), Uells (52,894 euro), Finlandë (52,272 euro) dhe Angli (50,727 euro).
Ndër ekonomitë më të mëdha evropiane, Gjermania ofron pagat më të larta, ndërsa Italia renditet e fundit me 32,100 euro. Në Francë, paga mesatare e mësuesve të arsimit fillor arrin në 41,968 euro. Për Spanjën nuk ka të dhëna të disponueshme në këtë krahasim.
Në shtatë vende, pagat mesatare vjetore janë nën 25 mijë euro. Këto janë Çekia (24,457 euro), Hungaria (23,181 euro), Sllovakia (22,936 euro), Rumania (20,805 euro), Letonia (20,516 euro), Greqia (18,746 euro) dhe Turqia (18,669 euro).
Sipas Daniel Wisniewski, sekretar i përgjithshëm i Federatës Evropiane të Punëdhënësve në Arsim, diferencat shpjegohen nga nivelet e të ardhurave kombëtare, strukturat e pagave, kualifikimet dhe ecuria e karrierës. Krahasimet ndikohen edhe nga sistemet e ndryshme të taksimit dhe përfitimeve sociale.
Profesorët e shkollave të mesme paguhen më shumë
Në përgjithësi, mësuesit e arsimit të mesëm të lartë përfitojnë paga më të larta sesa ata të arsimit fillor.
Paga mesatare vjetore për këtë kategori varion nga 17,615 euro në Turqi në 93,938 euro në Islandë. Në Danimarkë arrin në 85,999 euro dhe në Gjermani në 80,163 euro.
Diferencat më të mëdha në favor të profesorëve të arsimit të mesëm regjistrohen në Islandë, Finlandë, Belgjikë, Danimarkë, Austri dhe Gjermani, ku ata marrin të paktën 10 mijë euro më shumë në vit sesa mësuesit e arsimit fillor.
Përjashtim bëjnë Turqia dhe Irlanda e Veriut, ku mësuesit e arsimit fillor paguhen më shumë. Në Skoci, Lituani dhe Estoni, pagat janë të njëjta në të dy nivelet.
Fuqia blerëse ndryshon renditjen: Gjermania në krye
Megjithatë, pagat nominale nuk tregojnë domosdoshmërisht se sa mund të përballojë një mësues me të ardhurat e tij.
Për këtë arsye, Euronews ka përshtatur të dhënat e OECD-së sipas diferencave të çmimeve të konsumit në Evropë, duke përdorur treguesit e Eurostat për standardin e fuqisë blerëse (PPS).
Ky tregues mundëson krahasimin e sasisë së mallrave dhe shërbimeve që mund të blihen me të ardhurat në vende të ndryshme, duke neutralizuar diferencat e niveleve të çmimeve.
Pas këtij korrigjimi, Gjermania ngjitet në vendin e parë, me një pagë mesatare vjetore për mësuesit e arsimit fillor prej 64,143 PPS.
Pas saj renditen Austria (58,265 PPS), Danimarka (53,036 PPS), Irlanda (51,226 PPS) dhe komuniteti flamand i Belgjikës (50,846 PPS).
Në fund të renditjes qëndron Greqia, me vetëm 21,456 PPS, e ndjekur nga Letonia (24,670 PPS), Sllovakia (26,916 PPS), Çekia (27,349 PPS) dhe Estonia (28,197 PPS).
Edhe për profesorët e arsimit të mesëm të lartë, Gjermania kryeson me 74,034 PPS, ndërsa Greqia mbetet e fundit me 23,289 PPS.
Mes ekonomive të mëdha evropiane të krahasuara, Italia renditet në fund me 36,964 PPS. Anglia, me 43,091 PPS, qëndron poshtë Francës, ku fuqia blerëse arrin në 46,058 PPS.
Krahasimi tregon se kostoja e jetesës nuk është faktori i vetëm që përcakton diferencat. Politikat kombëtare të pagave, kërkesat për kualifikim, përvoja dhe mundësitë e punësimit në profesione të tjera luajnë gjithashtu një rol të rëndësishëm.
Korrigjimi sipas fuqisë blerëse sjell ndryshime të ndjeshme në renditjen e vendeve.
Turqia ngjitet gjashtë pozicione dhe Polonia pesë, ndërsa komuniteti frankofon i Belgjikës dhe Rumania fitojnë nga katër pozicione.
Në të kundërt, Islanda regjistron rënien më të madhe, duke kaluar nga vendi i dytë për pagat nominale në vendin e 12-të për fuqinë blerëse. Suedia dhe Estonia humbasin nga tre pozicione.
Ekspertët theksojnë se pagat mbeten një nga pengesat kryesore për tërheqjen dhe mbajtjen e mësuesve në profesion.
Sipas OECD-së, pagat aktuale të mësuesve në arsimin fillor dhe të mesëm të përgjithshëm përfaqësojnë mesatarisht vetëm 87–95% të të ardhurave të punonjësve të tjerë me arsim të lartë.
Kjo do të thotë se personat me kualifikime të ngjashme shpesh mund të sigurojnë paga më të larta në profesione të tjera.
Përfaqësuesit e organizatave evropiane të arsimit kërkojnë që pagat e mësuesve të jenë të krahasueshme me ato të profesioneve që kërkojnë të njëjtin nivel kualifikimi dhe përgjegjësie, për të përballuar mungesën e personelit dhe për të rritur tërheqjen ndaj profesionit./ekofin
