Mbledhja e zgjeruar e Grupit Parlamentar të Partisë Socialiste, e thirrur nga kryeministri Edi Rama, është shtyrë për të mërkurën, në orën 12:30. Takimi do të zhvillohet në Pallatin e Brigadave, ku pritet të marrin pjesë deputetët dhe ministrat e mazhorancës socialiste.
Mbledhja ishte planifikuar të zhvillohej ditën e nesërme, por është vendosur të mbahet të mërkurën. Takimi vjen në një moment tensionesh brenda Partisë Socialiste, pas debateve dhe pakënaqësive të shfaqura lidhur me draftin e Reformës Territoriale.
Pavarësisht kundërshtive, reforma u votua në Kuvend nga të gjithë deputetët e mazhorancës. Megjithatë, gjatë diskutimeve për këtë çështje, deputetët Erion Braçe, Vullnet Sinaj dhe Elisa Spiropali shprehën rezervat e tyre.
Veçanërisht i zëshëm në kundërshtitë e tij ishte deputeti Erion Braçe, i cili, edhe pse votoi pro reformës, deklaroi se vijonte të ishte kundër përmbajtjes së saj. Braçe argumentoi se vota e tij ishte dhënë për të mos rrezikuar përjashtimin nga Partia Socialiste, pasi kryeministri Edi Rama kishte paralajmëruar se deputetët që nuk do ta mbështesnin reformën do të përjashtoheshin nga partia.
Mbetet për t’u parë nëse në mbledhjen e së mërkurës, kryeministri Edi Rama, do të ndalet te kundërshtitë e shfaqura nga deputetët e mësipërm dhe nëse gjatë takimit do të ketë diskutime të tjera lidhur me reformën dhe qëndrimet e grupit parlamentar.
Deri më tani, nuk ka detaje zyrtare mbi rendin e plotë të ditës së mbledhjes apo çështjet e tjera që mund të diskutohen gjatë takimit.
