Belind Këlliçi i kërkon Elisa Spiropalit të bëhet bashkëpunëtore e drejtësisë

Deputeti dhe nënkryetari i PD-së, Belind Këlliçi, ka bërë një thirrje publike drejtuar deputetes socialiste Elisa Spiropali.

Përmes një postimi në rrjetet e tij sociale, Këlliçi shprehet se në seancën e fundit plenare,Spiropali ka bërë një denoncim të fortë dhe pranoi se brenda mazhorancës ka persona apo grupe që bëjnë presion, duke nënkuptuar Belinda Ballukun.

Demokrati thekson se është për t’u vlerësuar disi kjo ngritje zëri e Elisës dhe adresimi konkret, por nëse ajo dëshiron të japë më shumë kontribut për shoqërinë, mund të bashkëpunojë me drejtësinë.

Postimi i plotë:

Kur Elisa denoncon Belindën publikisht për presione shantazh!

Në seancën e fundit parlamentare, Elisa Spiropali ka bërë një denoncim të fortë. Ajo pranoi se brenda mazhorancës ka persona apo grupe që bëjnë presion, duke nënkuptuar Belinda Ballukun.

Deputetja gjithashtu konfirmoi se ish zëvendëskryeministrja ka ushtruar shantazh ndaj kundërshtarëve me krimin e organizuar, në zgjedhjet e fundit të 2025. Spiropali po ashtu u shpreh se Balluku e ka vendin në burg!

Lufta për pushtet mes klaneve të rilindjes njihet. Ajo është aq e fortë sa ka shkaktuar jo pak viktima.

Veliaj është në burg, Gysi dhe Vlora po ashtu. Ata e meritojnë të jenë subjek i drejtësisë për krimet që kanë kryer, po nuk do të ishin aty sot pa investimin e Ramës apo Ballukut.

Eshtë hera e parë që një deputet brenda shumicës flet kaq hapur. Nuk dihet nga e ka marrë kurajon Spiropali ta bëjë këtë denoncim, por mund të thuhet se tani ata nuk llogarisin më asgjë, pasi aq e ashpër është përplasja mes tyre.

Këto janë shenjat e një pushteti të abuzuar në palcë, ku prioritet është vetëm pasurimi e fuqizimi i grupimeve kriminale.

Por po ashtu, janë shenjat e kalbëzimit në skaj të këtij pushteti që është në rrënim total.

Është për t’u vlerësuar disi kjo ngritje zëri e Elisës dhe adresimi konkret.

Nëse ajo dëshiron të japë më shumë kontribut për shoqërinë, mund të bashkëpunojë me drejtësinë.

Të tregojë faktet që di për shantazhimin që bën Belinda Balluku ndaj kundërshtarëve politike, brenda dhe jashtë llojit!