Tirana feston në derbi, Partizani në krizë. Të kuqtë “fundosen”

Tirana ka fituar derbin e kryeqytetit duke mposhtur Partizanin me rezultatin 3-1 në ndeshjen e vlefshme për javën e gjashtë të Superiores.

Ndeshja nisi vrullshëm për bardheblutë, të cilët kaluan në avantazh që në minutën e 7-të me anë të një supergoli nga jashtë zone të shënuar nga Redon Xhixha.

Pas një shtylle të goditur nga Aliu në minutën e 15-të, Partizani arriti të barazojë shifrat në minutën e 36-të me Himallarin, i cili dërgoi topin në rrjetë pas një asisti nga Skuka.

Pjesa e dytë solli raste të shumta për të dyja skuadrat, ku Hazrollaj shpërdoroi dy mundësi për Tiranën, ndërsa Aliu u ndal sërish nga shtylla për të kuqtë.

Ekuilibrat u prishën në minutën e 79-të, kur Ilevski riktheu avantazhin për Tiranën duke shfrytëzuar një asist të saktë nga Kis brenda zonës.

Gjashtë minuta më vonë, në të 85-ën, vetë Kis vulosi fitoren 3-1 nga pika e penalltisë, pas një faulli të fituar nga Bernard Berisha.

Me këtë sukses, Tirana ngjitet në vendin e katërt të klasifikimit me 8 pikë të grumbulluara. Nga ana tjetër, Partizani thellon krizën e rezultateve duke zbritur në vendin e nëntë me vetëm 4 pikë pas gjashtë javësh kampionat.