Papa Leoni XIV ka njoftuar këtë të diel, më 11 tetor, se do t’i nënshtrohet një ndërhyrjeje kirurgjikale, pasi gjatë kontrolleve të fundit mjekësore i është zbuluar një nodul në njërën prej mushkërive. Lajmin e bëri të ditur vetë Ati i Shenjtë, gjatë lutjes tradicionale të së dielës, Angelus, përpara besimtarëve të mbledhur në Sheshin e Shën Pjetrit, në Vatikan.
Papa 71-vjeçar shpjegoi se noduli është zbuluar në një fazë shumë të hershme dhe është i lokalizuar mirë. Pas vlerësimeve mjekësore, specialistët kanë rekomanduar heqjen e tij përmes një operacioni. “Mjekët e konsiderojnë të përshtatshme ndërhyrjen dhe, duke ndjekur këshillat e tyre, kam vendosur t’i nënshtrohem operacionit për ta hequr”, deklaroi Papa. Sipas tij, ndërhyrja kirurgjikale është planifikuar të kryhet gjatë ditëve të ardhshme, por ende nuk është bërë e ditur data e saktë.
Deri tani, Vatikani nuk ka dhënë informacione të tjera mbi natyrën e nodulit apo shkaqet e shfaqjes së tij. Gjithashtu, nuk është sqaruar nëse bëhet fjalë për një formacion beninj apo malinj. Gjatë deklaratës, Papa Leoni XIV falënderoi besimtarët për mbështetjen shpirtërore dhe u kërkoi ta përfshijnë në lutjet e tyre përpara ndërhyrjes.
