Dodik: Kërkova largimin e Schmidtit nga Bosnja gjatë bisedimeve me administratën Trump për heqjen e sanksioneve

Milorad Dodik ka deklaruar se i kishte kërkuar administratës Trump të siguronte largimin e Christian Schmidtit nga posti i Përfaqësuesit të Lartë në Bosnjë dhe Hercegovinë, gjatë negociatave për heqjen e sanksioneve amerikane ndaj tij.

Në një intervistë për Radio Televizionin e Serbisë (RTS), Dodik pretendoi se zyrtarët amerikanë i kishin kërkuar shfuqizimin e “dy ose tre” ligjeve të Republikës Srpska, të cilat Gjykata Kushtetuese e Bosnjës dhe Hercegovinës i kishte rrëzuar më parë.

Sipas Dodik, ai kishte pranuar kërkesën, por kishte kërkuar lëshime të tjera nga Uashingtoni.

“Thashë: ‘Në rregull, por kjo është shumë pak nga ana juaj’”, kujtoi ai. Kur u pyet se çfarë tjetër kishte kërkuar, Dodik tha se ishte përgjigjur: “Largojeni këtë Schmidt”.

I pyetur nëse amerikanët kishin vepruar sipas kërkesës së tij, Dodik fillimisht tha: “Nuk e di nëse më dëgjojnë, por sido që të jetë, ai tani është larguar”.

Më pas, ai e sqaroi përgjigjen, duke thënë se nuk mendonte se zyrtarët amerikanë e kishin dëgjuar drejtpërdrejt, por se “u krijuan rrethanat e duhura”.

Dodik pretendoi gjithashtu se Schmidtit i ishte thënë gjatë një vizite në Shtetet e Bashkuara se misioni i tij kishte përfunduar dhe se duhej të kthehej në Gjermani. Gjatë intervistës, ai nuk përmendi emrat e zyrtarëve që dyshohet se ishin përfshirë dhe nuk paraqiti prova për pretendimet e tij.

Më 29 tetor 2025, Departamenti i Thesarit i SHBA-së hoqi nga lista e sanksioneve Dodikun, anëtarë të familjes së tij, bashkëpunëtorë politikë dhe kompani të lidhura me ta.

Dodik ishte sanksionuar fillimisht në vitin 2017 për pengimin e zbatimit të Marrëveshjes së Paqes së Dejtonit. Sanksione të tjera iu vendosën në vitin 2022 për korrupsion dhe veprime që minonin institucionet e Bosnjës dhe Hercegovinës.

Vendimi erdhi pas disa hapave të ndërmarrë nga Asambleja Kombëtare e Republikës Srpska, e cila caktoi një president të përkohshëm pas largimit të Dodikut nga detyra dhe shfuqizoi një sërë ligjesh që sfidonin institucionet shtetërore.

Departamenti i Shtetit i SHBA-së i mirëpriti këto hapa, duke i cilësuar si kontribut në uljen e tensioneve. Megjithatë, Zyra për Kontrollin e Aseteve të Huaja (OFAC) nuk dha shpjegime për arsyet e heqjes së sanksioneve.

Në maj të vitit 2026, Schmidt njoftoi dorëheqjen, duke e cilësuar fillimisht si një vendim personal. Më vonë gjatë po atij muaji, ai i tha gazetës gjermane Augsburger Allgemeine se kishte përjetuar presion të konsiderueshëm dhe të papritur nga SHBA-ja për t’u larguar më herët nga sa kishte planifikuar, raportoi Reuters në qershor.