Aktorja amerikane Amanda Seyfried ka zbuluar se ka refuzuar një rol kryesor në një serial të ri televiziv, pasi projekti përfshinte shumë skena intime.
Aktorja e filmit Mamma Mia! pranoi se, ndryshe nga më parë, tashmë nuk ndihet rehat me realizimin e skenave të tilla.
Gjatë një diskutimi në Festivalin Ndërkombëtar të Filmit në Hamptons, më 4 tetor, aktorja 40-vjeçare tregoi se kishte vendosur të mos pranonte një projekt ku do t’i duhej të interpretonte vazhdimisht skena seksuale.
“Refuzova një serial ku do të më duhej të bëja vazhdimisht seks, për shkak të skenave të tilla”, u shpreh ajo.
“Nuk dua ta bëj. Nuk ndihem rehat me këtë. Për momentin, nuk më tërheq më”, shtoi Seyfried gjatë bisedës me Alec Baldwin.
Aktorja shpjegoi se qëndrimi i saj ndaj skenave intime ka ndryshuar me kalimin e viteve. Në fillim të karrierës, ajo nuk e kishte problem të interpretonte skena romantike me kolegët e saj, madje i konsideronte ato pjesë argëtuese të profesionit.
“Dikur nuk ishte aspak problem. Mendoja: ‘Sot do të puthem me një person tërheqës dhe do të paguhem për këtë’”, tregoi ajo me humor.
Megjithatë, sot perspektiva e saj është ndryshe. Seyfried, e cila ka dy fëmijë, vajzën Nina dhe djalin Thomas, pranoi se mëmësia ka ndikuar edhe në mënyrën se si i vlerëson projektet profesionale dhe kufijtë që dëshiron të vendosë.
“Kam fëmijë që i kushtojnë vëmendje asaj që bëj”, shpjegoi aktorja, duke shtuar se për momentin nuk dëshiron të përballet me situata ku duhet të jetë e zhveshur përpara një personi të panjohur.
“Sa më shumë rritem, aq më e çuditshme më duket. Na duhet të sillemi në mënyrë romantike me njerëz me të cilët nuk kemi një marrëdhënie të tillë”, tha ajo.
Seyfried la të kuptohet se në të ardhmen mund ta shohë ndryshe një ofertë të ngjashme, por për momentin ndihet më e sigurt duke vendosur kufij të qartë në zgjedhjet e saj profesionale.
