Një sulm kibernetik ka goditur rrjetet e mëdha të supermarketeve në Francë, duke shkaktuar prishjen e sasive të mëdha të produkteve ushqimore të ngrira dhe dëme financiare që vlerësohen në miliona euro. Hakerët dyshohet se kanë ndërhyrë nga distanca në sistemet e ftohjes së dyqaneve, duke ndryshuar temperaturat e frigoriferëve.
Zinxhirët e supermarketeve Intermarché dhe Coopérative U konfirmuan të hënën, më 12 tetor, për gazetën franceze “Le Figaro” se ishin prekur nga sulmi, i cili ndodhi gjatë natës mes së dielës dhe së hënës.
Pasojat u konstatuan menjëherë, pasi temperaturat e ndryshuara vunë në rrezik ruajtjen e produkteve ushqimore dhe detyruan dyqanet të asgjësonin sasi të konsiderueshme ushqimesh të ngrira.
Si arritën hakerët të ndërhynin në frigoriferë?
Sipas informacioneve paraprake, sulmi kishte në shënjestër një program kompjuterik të kompanisë daneze Danfoss, i përdorur për administrimin e një pjese të sistemeve të ftohjes në supermarketet franceze.
Autorët dyshohet se shfrytëzuan versione të vjetra të këtij programi për të marrë kontrollin mbi funksionin e shkrirjes së akullit në pajisjet e ftohjes. Përmes kësaj ndërhyrjeje, ata arritën të ndryshonin nga distanca temperaturat e frigoriferëve, duke rrezikuar sigurinë e mijëra produkteve ushqimore.
Shtrirja e sulmit ndryshon sipas rrjeteve të prekura. Coopérative U vlerëson se janë goditur më pak se 100 dyqane, ndërsa Intermarché raporton se numri i supermarketeve të prekura është nga 150 deri në 200.
Grupi Groupement Mousquetaires, pjesë e të cilit është Intermarché, i vlerëson humbjet financiare në disa milionë euro. Megjithatë, përllogaritja e plotë e dëmeve nuk ka përfunduar ende.
Prokuroria e Parisit nis hetimet
Agjencia Franceze e Lajmeve (AFP) raporton se Prokuroria e Parisit ka nisur një hetim për sulmin kibernetik, me qëllim zbardhjen e rrethanave dhe identifikimin e përgjegjësve.
Ndërkohë, Ministria franceze e Tregtisë ka bërë të ditur se është në kontakt me zinxhirët e supermarketeve të prekur, por deri tani nuk ka dhënë informacione të tjera përtej të dhënave të bëra publike.
Shkaqet e plota të sulmit dhe mënyra se si autorët arritën të hynin në sistemet e ftohjes mbeten ende për t’u sqaruar.