Thirrja e Ivica Daçiqit se një ditë flamuri serb do të valojë mbi Prizrenin ka sjellë sërish në skenë retorikën nacionaliste të Beogradit dhe ambicionet territoriale ndaj Kosovës. Ndaj kësaj deklarate është shprehur edhe ish-ministri gjerman për Evropën, Michael Roth, i cili e cilësoi si të rrezikshme një politikë të tillë dhe propozoi ndërprerjen e fondeve të Bashkimit Evropian për Serbinë.
Të lidhura
None found
Profesori Nijazi Halili, duke folur për gazetën “Bota sot”, thekson se fjalët e tilla nuk janë të rastësishme, por përbëjnë mesazhe nacionaliste që e vënë në dyshim sovranitetin e Kosovës. Sipas tij, Brukseli duhet të reagojë më ashpër dhe të mos i lërë kërcënimet pa pasoja të prekshme.
“Deklarata e Ivica Daçiqit se flamuri serb do të valojë një ditë mbi Prizren është dëshmi e një diskursi politik që vazhdon ta sfidojë sovranitetin dhe integritetin territorial të Kosovës. Këto nuk janë deklarata të pafajshme, por mesazhe nacionaliste që ushqejnë pretendime territoriale dhe rrezikojnë stabilitetin në rajon“, thotë Halili.
Për sa i përket paralajmërimit të Roth-it se një politikë e tillë mund të përfundojë në luftë, profesori vlerëson se kjo vlerësim meriton seriozitet, pa kjo të domë thotë se një konflikt i ri është i pashmangshëm.
Të metat reale, sipas tij, qëndrojnë në tolerimin e vazhdueshëm të fjalëve kërcënuese dhe në mungesën e ndëshkimit konkret për deklaratat që përcjellin dyshime mbi kufijtë dhe sovranitetin e Kosovës.
“Paralajmërimi i Michael Roth se një politikë e tillë mund të çojë drejt luftës duhet marrë seriozisht. Kjo nuk do të thotë se lufta është e pashmangshme, por se retorika kërcënuese, kur tolerohet dhe nuk shoqërohet me pasoja, mund të krijojë terren për veprime destabilizuese. Paqja nuk mund të garantohet duke mbyllur sytë para deklaratave që vënë në pikëpyetje kufijtë dhe sovranitetin e një shteti“, thekson ai.
Halili ia kalon pastaj theksin përgjegjësisë së Bashkimit Evropian, duke e kërkuar nga Brukseli që të mos e kufizojë vetëm tek shprehja e shqetësimit, por të hedhë hapa konkretë për t’i bërë Serbisë qartë se ka përgjegjësi për fjalët e saj.
Një nga masat që sipas professorit duhet të shqyrtohet është lidhja e fondeve evropiane dhe e përfitimeve nga integrimi me sjelljen e Beogradit.
“Përgjegjësia e Bashkimit Evropian është të kalojë nga deklaratat e shqetësimit në një politikë konkrete të kushtëzimit dhe llogaridhënies. Nëse Serbia vazhdon me një retorikë të tillë, BE-ja duhet të shqyrtojë masa konkrete, përfshirë kushtëzimin e fondeve evropiane dhe të përfitimeve nga procesi i integrimit. Nuk mund të kërkohet nga Kosova të dëshmojë vazhdimisht përkushtim ndaj dialogut, ndërkohë që deklaratat destabilizuese nga Beogradi kalojnë pa pasoja të krahasueshme”, vlerëson Halili.
Professori insiston që qasja e BE-së duhet të jetë e barabartë për të gjitha palët dhe se Serbia nuk duhet të vazhdojë të gëzojë përfitimet e integrimit, nëse nuk tregon ndjeshmëri të vërtetë për fqinjësinë e mirë dhe normalizimin e lidhjeve me Kosovën.
Në këtë kuptim, ai nënvizon se respekti për sovranitetin e Kosovës duhet të përbëjë kusht bazë në marrëdhëniet e Serbisë me Bashkimin Evropian.
“Serbia duhet ta kuptojë se rruga drejt Bashkimit Evropian kalon përmes respektimit të fqinjëve, heqjes dorë nga pretendimet territoriale dhe angazhimit të sinqertë për normalizimin e marrëdhënieve me Kosovën”, pohon ai.
Mbyllja e vlerësimit të Halilit ka të bëjë me faktin se Kosova është shtet sovran dhe i pavarur, ndërsa sigurimi i paqes dhe stabilitetit kërkon një qëndrim të palëkundur të bashkësisë ndërkombëtare ndaj çdo fjale apo vepre që e shkel këto parime.
Për të mos lënë pretensjone të tilla thjesht si çështje diplomatike, sipas tij, BE-ja duhet të demonstrojë durim dhe përkushtim në mbrojtjen e sovranitetit dhe të tërësisë territoriale të Kosovës.
“Kosova nuk është objekt i ambicieve territoriale të askujt, por shtet sovran dhe i pavarur. Paqja në rajon kërkon respektim të ndërsjellë, ndërsa stabiliteti afatgjatë kërkon që Bashkimi Evropian të jetë i vendosur dhe konsekuent në mbrojtjen e këtyre parimeve”, mbyll profesori Nijazi Halili për “Bota sot”.
