Anëtarja e Dhomës Britanike, Silvana Xhaferri Hoxha: Protesta e fundit tregoi se nuk ka më opozitë as në letër

Aktivistja dhe anëtarja e Dhomës Britanike, Silvana Xhaferri Hoxha, ka komentuar protestën e datës 8, duke kritikuar opozitën për mënyrën se si e shfrytëzoi këtë tubim dhe për mbështetjen e kufizuar nga qytetarët. Sipas Hoxhës, opozita synonte të demonstronte forcën e saj politike, por pjesëmarrja në protestë nuk përmbushi pritshmëritë.

“Opozita besoj se shfrytëzoi momentin për të treguar forcën e saj”, u shpreh ajo, duke shtuar se pjesëmarrja e tyre ishte e planifikuar: “Në protestën e datës 8 e kishim të qartë që do të ishim”. Hoxha kritikoi gjithashtu të gjithë klasën politike për situatën aktuale në vend, duke deklaruar: “Ne bëjmë fajtorë të gjithë klasën politike të këtyre 36 viteve për këtë realitet ku jemi sot”.

Ajo u ndal edhe te drejtimi i opozitës, duke argumentuar se ndryshimi duhet të nisë nga kryetari i saj. “Lëvizja më e ndershme do të ishte që kryetari i opozitës të largohej”, deklaroi Hoxha, duke shtuar se moslargimi i tij është, sipas saj, një nga arsyet që Edi Rama vijon të jetë në pushtet.

Duke analizuar pjesëmarrjen në protestë, aktivistja tha se opozita mund ta ketë parë tubimin si një mundësi për të matur forcat politike, por rezultati, sipas saj, tregoi të kundërtën. Hoxha pretendoi gjithashtu se gjatë protestës kishte pasur “elementë të infiltruar nga PD”, pa dhënë detaje të tjera në deklaratën e cituar.