Një 57-vjeçar shqiptar është arrestuar në Padova të Italisë, pasi tentoi t’u largohej karabinierëve me makinë, duke kryer manovra të rrezikshme në disa zona të qytetit. Ai drejtonte automjetin me 2,2 gramë alkool për litër gjak, hipi në trotuare dhe përshkoi rreth një kilometër në sens të kundërt.
Ngjarja ndodhi gjatë natës mes së dielës dhe së hënës, rreth orës 04:00. Sipas mediave italiane, shqiptari ishte në timonin e një automjeti tip “Ford Focus” dhe lëvizi nëpër lagjet Guizza dhe Voltabarozzo, duke vijuar më pas përgjatë Lungargine Ziani në drejtim të kundërt me qarkullimin.
Manovrat e tij të rrezikshme detyruan patrullat e policisë të ndërhynin për të shmangur aksidentet. Ndjekja përfundoi në rrugën Guasti, pas ndërhyrjes së përbashkët të karabinierëve dhe Policisë së Shtetit.
Gjatë kontrollit, testi i alkoolit tregoi se 57-vjeçari drejtonte automjetin në gjendje të rëndë dehjeje, me një përqendrim prej 2,2 gramësh alkool për litër gjak. Ai u arrestua për rezistencë ndaj një zyrtari publik. Ndërkohë, gjatë kontrollit të çantës së tij u gjet edhe një kaçavidë.
Në automjet ndodheshin edhe dy persona të tjerë, të cilët u proceduan nga autoritetet italiane. Një shtetas moldav, 47 vjeç, akuzohet se ka goditur një efektiv policie gjatë kontrollit, ndërsa një shtetas rumun u procedua për dehje të dukshme në një vend publik.
Ndërkohë, komisari i policisë së Padovës, Marco Odorisio, ka nisur procedurat për të vlerësuar revokimin e lejes së qëndrimit të shqiptarit. Sipas raportimeve të mediave italiane, 57-vjeçari ka precedentë të mëparshëm.
