Të paktën 17 persona kanë mbetur të plagosur pas një aksidenti të rëndë me autobus, të ndodhur të hënën, më 12 tetor, në zonën e Aksu-së, në Antalia të Turqisë. Një nga të plagosurit raportohet se ndodhet në gjendje të rëndë në spital.
Sipas mediave turke, autobusi humbi kontrollin, rrëshqiti dhe u përmbys në mes të rrugës. Pas aksidentit, në vendngjarje mbërritën ekipet e emergjencës, policia dhe ambulancat, të cilat u dhanë ndihmën e nevojshme të plagosurve.
Djali i shoferit, Esref Taşçi, pretendoi se shkak i aksidentit ishte nafta e derdhur në rrugë. Sipas tij, babai i tij, Huseyin Taşçi, u përpoq të mbante nën kontroll autobusin, por nuk arriti të shmangte përmbysjen.
Antalya’da 17 yolcunun yaralandığı midibüs kazası kamerada… https://t.co/CQB6MAqejk
— TRT HABER (@trthaber) October 12, 2026
“Nafta ishte derdhur në rrugë. Babai im u përpoq të mbante kontrollin e automjetit, por nuk mundi ta parandalonte përmbysjen e tij”, deklaroi ai.
Ndërkohë, guvernatori i Antalias, Sahin, i tregoi shoferit pamjet e aksidentit në telefonin e tij celular dhe i tha: “Duket sikur po vraponit”.
Autoritetet po shqyrtojnë rrethanat e ngjarjes për të përcaktuar shkakun e saktë të aksidentit dhe arsyet që çuan në humbjen e kontrollit të autobusit.