Bella Hadid ka festuar ditëlindjen e saj të 30-të dhe, siç pritej, nuk kanë munguar fotografitë dhe veshjet e veçanta. Modelja, e cila mbushi 30 vjeç më 9 tetor, publikoi në Instagram disa imazhe nga festimet, duke tërhequr vëmendjen me një bikini të kuqe të personalizuar.
Sipas InStyle, bikini kishte numrin 30 të shkruar në pjesën e sipërme dhe emrin “Bella” në pjesën e pasme. Modelja e kombinoi me një fustan të lehtë kuq e bardhë, çizme kauboj prej lëkure kafe dhe bizhuteri të arta.
Fotografitë u realizuan pranë një liqeni dhe përcillnin një atmosferë të relaksuar, larg tapetit të kuq dhe eventeve tradicionale të modës.
Por bikini nuk ishte e vetmja veshje që tërhoqi vëmendjen. Hadid publikoi edhe fotografi me xhinse të gjera me qëndisje lulesh dhe fluturash, një bluzë të bardhë dhe një triko rozë. Kombinimi sillte elemente të modës së viteve 2000.
Në një tjetër moment të festës, ajo u shfaq duke fryrë qirinjtë e tortës me një fustan sateni dhe detaje të bardha me shkëlqim.
Bella Hadid ka qenë prej vitesh një nga figurat më të ndjekura të industrisë së modës. Stili i saj ndërthur shpesh veshje vintage, elemente bohemiane dhe kombinime të papritura. Modelja e nisi dekadën e re me disa veshje krejt të ndryshme, por me të njëjtin stil që e ka bërë të dallueshme.
