Një 57-vjeçar shqiptar është arrestuar në Padova të Italisë, pasi tentoi t’u largohej karabinierëve me makinë, duke kryer manovra të rrezikshme në disa zona të qytetit. Ai drejtonte automjetin me një përqendrim alkooli prej 2,2 gramësh për litër gjak, ndërsa autoritetet kanë nisur edhe procedurat për të vlerësuar revokimin e lejes së tij të qëndrimit.
Ngjarja ndodhi gjatë natës mes së dielës dhe së hënës, rreth orës 04:00. Sipas mediave italiane, shqiptari ishte në timonin e një automjeti tip “Ford Focus” dhe përshkoi lagjet Guizza dhe Voltabarozzo, duke hipur në trotuare dhe duke udhëtuar për rreth një kilometër në sens të kundërt përgjatë Lungargine Ziani.
Manovrat e tij të rrezikshme i detyruan patrullat e policisë të ndërhynin për të shmangur aksidentet. Ndjekja përfundoi në rrugën Guasti, pas një operacioni të përbashkët të karabinierëve dhe Policisë së Shtetit.
Kontrolli me alkooltest konfirmoi se 57-vjeçari drejtonte automjetin në gjendje të rëndë dehjeje. Ai u arrestua për rezistencë ndaj një zyrtari publik. Gjatë kontrollit, në çantën e tij u gjet edhe një kaçavidë.
Në automjet ndodheshin edhe dy persona të tjerë, të cilët u proceduan nga autoritetet. Një shtetas moldav, 47 vjeç, akuzohet se ka goditur një efektiv policie gjatë kontrollit, ndërsa një shtetas rumun u procedua për dehje të dukshme në një vend publik.
Ndërkohë, komisari i policisë së Padovës, Marco Odorisio, ka nisur procedurat për të vlerësuar mundësinë e revokimit të lejes së qëndrimit të shqiptarit. Sipas raportimeve, 57-vjeçari ka precedentë të mëparshëm.