Bashkimi Evropian do të hapë zyrtarisht kapituj të rinj negociatash me Ukrainën nesër, një hap i domosdoshëm përpara se vendi të mund të bashkohet me BE-në, njoftoi sot Presidenti i Këshillit Evropian, Antonio Costa.
“E mirëpres vendimin e marrë sot nga shtetet anëtare të BE-së për të hapur dy kapituj të rinj negociatash me Ukrainën dhe Moldavinë. Presim me padurim hapjen e të gjithë të tjerëve sa më shpejt të jetë e mundur”, shkroi ai në një postim në X.
27 vendet ranë dakord të hapin dy kapituj të rinj negociatash me Moldavinë, pranimi i së cilës në BE është i lidhur me atë të Ukrainës.
Miratimi, më herët sot, nga Parlamenti ukrainas i ligjit mbi të drejtat e pakicave në arsim dhe gjuhë, një reformë e kërkuar nga Hungaria, lejoi që ky hap i ri të hidhet në rrugën drejt pranimit të Ukrainës në BE.
Tre kapituj të tjerë negociatash pritet të mbyllen gjithashtu të martën me Malin e Zi, i cili aspiron të bashkohet me BE-në në vitin 2028 së bashku me Shqipërinë.
Vendet kandidate, përfshirë Ukrainën, kanë ende një rrugë të gjatë për të bërë përpara se të arrijnë “acquis communautaire”, pra të miratojnë rregullat e BE-së për gjithçka, nga mjedisi dhe bujqësia deri te tregu i brendshëm.
Në total, secila prej tyre do të duhet të përfundojë të paktën 35 kapituj negociues përpara se blloku prej 27 anëtarësh të vendosë unanimisht për pranimin e tyre dhe ta ratifikojë atë në secilin shtet anëtar, qoftë nga parlamenti i tij ose në një referendum.
